Արցախի նախագահ Արայիկ Հարությունյանը հարցաքննության հրավիրվելու վերաբերյալ ծանուցում դեռ չի ստացել, հետևաբար հայտնի չէ, թե ինչ կարգավիճակով է հարցաքննության հրավիրվում հարուցված քրեական գործի շրջանակում։ Այս մասին NEWS.am-ի հետ զրույցում ասաց նախագահի մամուլի քարտուղար Լուսինե Ավանեսյանը։
«Արայիկ Հարությունյանը անպայման գնալու է հարցաքննության։ Մտավախություններ չկան, դատախազությունը կատարում է իր գործը և նախագահը որպես քաղաքացի պարտավոր է ենթարկվել Արցախի օրենքներին և ներկայանալ հարցաքննության»,– ընդգծեց Լուսինե Ավանեսյանը։
Ինչպես ավելի վաղ հայտնել էինք՝ Արցախի նախագահ Արայիկ Հարությունյանը Քրեական օրենսգրքի 312-րդ հոդվածի 1-ին մասով նախատեսված հանցագործության հատկանիշներով հարուցված քրեական գործի շրջանակներում, առաջիկայում հրավիրվելու է հարցաքննության։
Արցախի Քրեական օրենսգրքի 312-րդ հոդվածի 1-ին մասը սահմանում է.
Սահմանադրական կարգը տապալելը` Սահմանադրության 1-ին հոդվածի 1-ին մասով, 2-6-րդ հոդվածներով կամ 7-րդ հոդվածի 1-ին մասով նախատեսված որեւէ նորմը փաստացի վերացնելը, որն արտահայտվում է իրավական համակարգում այդ նորմի գործողության դադարեցմամբ`պատժվում է ազատազրկմամբ` տասից տասնհինգ տարի ժամկետով: