Չինական TCL ընկերությունը ցուցադրել է եզակի Fold'n'Roll սմարթֆոնի նախատիպը, որի էկրանը կարելի է ձգել ու ծալել: GSM Arena պորտալը գրում է, որ խոսքը աշխարհում առաջին բջջային սարքի մասին է, որի էկրանը կարելի է երկու տարբեր եղանակով մեծացնել, հայտնում է Planet-today-ը:
TCL-ի պաշտոնական ներկայացուցիչների կարծիքով՝ Fold'n'Roll փորձարարական սարքը կարելի է համարել համընդհանուր՝ դա ե՛ւ սմարթֆոն է, ե՛ւ ֆաբլետ, ե՛ւ պլանշետային համակարգիչ: Եթե սարքը գտնվում է ծալված վիճակում, ապա դրա դիսփլեյի անկյունագիծը 6,87 դյույմ է: Կարելի է ծալել սարքը եւ ստանալ 8,85 դյույմանոց ֆաբլետ: Եթե դա բավարար չէ, ապա էկրանը կարելի է նաեւ ձգել՝ կստացվի տասը դյույմանոց պլանշետ:
Հետաքրքիր է, որ երեք վիճակներից յուրաքանչյուրում էկրանի կողմերի հարաբերակցությունը փոխվում է: Օրինակ, տեսանյութերն առավելագույն բացված տեսքով դիտելը ավելի հարմար է, քանի որ շրջանակները փոքրանում են:
Ինչպես ընդգծել է արտադրողը, Fold'n'Roll սմարթֆոնը դեռ վաղ նախատիպ է, որը շուտ չի հայտնվի խանութների դարակներում: Ավելին, սարքը կարող է ընդհանրապես դուրս չգալ կամ դուրս գալ, բայց զգալիորեն փոփոխված տեսքով: Հուսանք, որ TCL-ի ինժեներների հետաքրքիր մշակումները իզուր չեն լինի, եւ որ նմանատիպ տեխնոլոգիաներ կհայտնվեն ոչ միայն ընկերության սմարթֆոններում, այլ նաեւ այլ ապրանքանիշերի արտադրանքներում:
