Գլոբալ նվազագույն տոկոսադրույքի մասին G20 երկրների միջեւ վերջնական համաձայնությունը, հավանաբար, կարող է կազմել 15%, ինչը փոխզիջում է Իռլանդիայի ներկայիս 12,5% դրույքի եւ ԱՄՆ-ի առաջարկած 21%-ի միջեւ: Այս մասին հայտարարել է Վաշինգտոնի Հարկային ֆոնդի գլոբալ նախագծերի փոխնախագահ Դանիել Բաննը, հայտնում է Reuters-ը:

ԱՄՆ ֆինանսների նախարար Ջանեթ Յելլենը աջակցել է ԱՄՆ կառավարությանը` նպատակ ունենալով սահմանել աշխարհի կորպորատիվ հարկի նվազագույն դրույքաչափը` հնարավոր է, ճանապարհ հարթելով սերնդի մեջ առաջին անգամ միջազգային հարկային կանոնները թարմացնելու երկար սպասված գործարքի համար:

Դանիել Բանը նշել է, որ դեռ պարզ չէ՝ արդյոք այդպիսի հարկը պարտադիր կլինի, թե ոչ, եւ հնարավոր է, որ երկրները տեղական բիզնեսի համար ունենան ներքին հարկի առանձին դրույքաչափեր, որոնք ցածր են համաշխարհային նվազագույն հարկի դրույքաչափից:

Սա նշանակում է, որ «բազմազգ ֆիրմաները ավելի մեծ հարկային բեռի կբախվեն միայն այն բանի համար, որ նրանք աշխատում են արտերկրում»,- ասել է Բաննը Reuters Global Markets Forum-ում:

Նախագահ Ջո Բայդենի վարչակազմը ցանկանում է ԱՄՆ-ի կորպորատիվ հարկի դրույքը հասցնել 28%-ի, այդ իսկ պատճառով նա առաջարկել է համաշխարհային նվազագույնը` 21%:

«21% նվազագույն դրույքաչափը չափազանց բարձր կլինի համաձայնության հասնելու համար` զուտ ԱՄՆ օրենսդրական համատեքստում կամ ՏԶՀԿ (Տնտեսական համագործակցության եւ զարգացման կազմակերպություն) / G20 մակարդակում»,- ասել է Բաննը:

ՏԶՀԿ կազմի մեջ մտնող 37 ամենահարուստ երկրներում միջին կորպորատիվ հարկը կազմում է 23%:

Բաննը նաեւ ասել է, որ ԱՄՆ Կոնգրեսը կարող է բարձրացնել ներքին կորպորատիվ հարկի դրույքաչափը մինչեւ 25%, իսկ համաշխարհային ցածր հարկով ոչ նյութական եկամուտը կամ GILTI-ն` մոտ 16%:

GILTI-ն, որը նախկին նախագահ Դոնալդ Թրամփի հարկային օրենսդրության վերանայման մասին դրույթն է, սահմանում է արդյունավետ 10,5% հարկային դրույքաչափ՝ հարկային ապաստարաններից ստացվող եկամտի համար: