Կալիֆոռնիան եւ ՆԱՍԱ-ն, միլիարդատեր Մայքլ Բլումբերգի աջակցությամբ, 100 միլիոն դոլարի ջանքեր են գործադրել` ընտրված աղբյուրներից, ինչպիսիք են էլեկտրակայաններն ու նավթամշակման գործարանները, ջերմոցային խոշոր արտանետումները տիեզերքից հայտնաբերելու համար, հայտնում է Reuters-ը:
Նահանգի, ԱՄՆ տիեզերական գործակալության, արբանյակային Planet ընկերության եւ չորս այլ կազմակերպությունների միջեւ գործընկերությունը 2023 թվականին կգործարկի իր առաջին երկու արբանյակները: Այս տեխնոլոգիան կարող է օգնել բարձրացնել ճնշումը արդյունաբերության աղտոտող ոլորտների վրա:
Նախաձեռնությունը տիեզերական տեխնոլոգիաների աճող օգտագործման մի մասն է` մթնոլորտում իր գտնվելու առաջին 20 տարվա ընթացքում ածխաթթու գազից 80 անգամ ուժեղ մեթանի հիմնական աղբյուրները հայտնաբերելու համար: Գիտնականները ասում են, որ մեթանի աղբյուրների բացահայտումը կարեւոր նշանակություն ունի արտանետումների կտրուկ նվազեցման համար, որոնք անհրաժեշտ են կլիմայի փոփոխության վատթարագույն ազդեցությունները կանխելու համար:
Կոալիցիան գործում է Carbon Mapper կոչվող հասարակական կազմակերպության շրջանակներում, որին ֆինանսավորում են բարեգործական խմբերը։
Carbon Mapper արբանյակները կօգտագործեն ՆԱՍԱ-ի Ռեակտիվ շարժման լաբորատորիայի (JPL) կողմից մշակված տեխնոլոգիան` առանձին օբյեկտների մասշտաբով արտանետումները տեսնելու եւ չափելու համար: Արբանյակային մեկ այլ տեխնոլոգիա էլ թույլ կտա ավելի մեծ աշխարհագրական տարածքներում ջերմոցային գազերին հետեւել:
