Հունաստանը հաղթահարել է կորոնավիրուսով վարակման երրորդ ալիքը. անցած շաբաթ երկրում վարակվածների թիվը կրճատվել է կիսով չափ՝ ի տարբերություն նախորդ շաբաթվա: Այդ մասին ՏԱՍՍ-ի հետ հարցազրույցում հայտնել է Հունաստանի զբոսաշրջության նախարար Հարիս Թեոհարիսը:
«Ըստ ամենայնի՝ մենք հաղթահարել ենք երրորդ ալիքի գագաթնակետը: Անցած շաբաթվա ընթացքում մեզ մոտ գրանցվել է վարակման դեպքերի կրճատում 50 տոկոսով՝ ի տարբերություն դրա նախորդ շաբաթվա տվյալների»,-ասել է Թեոհարիսը:
Նա ընդգծել է, որ երկրում գործում են շատ խիստ կանոններ: «Հունաստանը միշտ խիստ վերաբերմունք է դրսեւորել առողջապահության վերաբերյալ իրավիճակին՝ արգելելով տեղաշարժը, փակելով ռեստորանները, անելով բազմաթիվ այլ քայլեր: Հաշվի առնելով դա՝ մենք կարող ենք վերահսկել իրավիճակը: Չնայած դա չի նշանակում, որ մենք գտնվում ենք այդ հարցում այնտեղ, որտեղ ցանկանում ենք: Մենք ցանկանում ենք պահպանել վարակվածության թվի նվազման միտումը»,-հավելել է նախարարը:
Քաղաքական գործիչը վստահություն է հայտնել է, որ Հունաստանը կհաղթահարի համավարակը, իսկ դրան կնպաստեն նոր գիտելիքները, որոնք ստացել են բժիշկները, պատվաստման ծրագիրը, որն իրականացվում է երկրում լավ տեմպերով, ինչպես նաեւ եղանակը: «Մենք անցած տարի տեսել ենք, որ եղանակը նպաստում է հիվանդության տարածումը զսպելուն»,-պարզաբանել է Թեոհարիսը:
Նրա խոսքով՝ երկրում քչերն են հրաժարվում պատվաստումից: Համաձայն ԱՀԿ-ի տվյալների՝ Հունաստանում 2020 թվականի հունվարի 3-ից մինչեւ ներկայիս տարվա ապրիլի 15-ը գրանցվել է կորոնավիրուսով վարակվելու 304 184 դեպք, մահացել է 9 135 մարդ: