Մենք հավասար վիճակում չեք գտնվում, որովհետեւ Ադրբեջանի հետ ինչ-որ բանի մասին խոսելուց առաջ թող նախ մեր տղաներին ու աղջիկներին վերադարձնեն, հետո նոր հաջորդ քայլի մասին կմտածենք: Այս մասին, այսօր՝ ապրիլի 16-ին, Թբիլիսիում հայ լրագրողների հետ զրույցում նշեց ՀՀ նախագահ Արմեն Սարգսյանը:
«Չի կարող երկկողմ հարաբերությունների վերականգնումը կամ նորմալացումը գնալ ի հաշիվ մի կողմի, ի հաշիվ մեզ: Ես չեմ կարող մոռանալ Եղեռնը որպես պատմություն, այդ ամենը մի կողմ դնել, եթե հակառակ կողմը որեւէ քայլ չի անում ճանաչման կամ ներողություն խնդրելու ուղղությամբ: Երբ դա կլինի, այդ ժամանակ կմտածենք, այդ ժամանակ պարզ կլինի»,-ասաց նա:
Հարցին, թե իր կարծիքով արդյոք ԱՄՆ նախագահ Ջո Բայդենը ապրիլի 24-ի իր ուղերձում կարտասանի «ցեղասպանություն» բառը, նախագահն արձագանքեց. «Ես իմ վերլուծությունն ունեմ եւ սխալ կլինի, եթե ՀՀ նախագահն ասի, թե ինքը սպասումներ ունի: Ի վերջո, դա ԱՄՆ նախագահի որոշումն է լինելու, ոչ թե իմ: Երբ որոշումը կլինի, մենք գնահատական կտանք: Ես կարող եմ վերլուծել, բայց ճիշտ չի լինի իմ կողմից դա բարձրաձայնելը»:
