Վիզուալիզացիայի կարեւորագույն տեխնոլոգիաներն արտահանելու Կանադայի արգելքը վնաս կհասցնի թուրքական մարտական դրոններին, Ahval-ին հայտարարել է Կանադայի ռազմաօդային ուժերի սպա եւ Թուրքիայում ու Ադրբեջանում նախկին ռազմական ներկայացուցիչ Քրիս Քիլֆորդը:
Ավելի վաղ Կանադան հայտարարել էր, որ չեղարկում է Թուրքիային մարտական ԱԹՍ-ներում օգտագործվող մասեր արտահանելու որոշումը, երբ զենքը կիրառվել էր Ադրբեջանի կողմից Ղարաբաղում վերջերս կայացած բախումների ժամանակ:
Քիլֆորդի խոսքով՝ նա ցուցմունք է տվել Կանադայի խորհրդարանական հանձնաժողովին Թուրքիայի կողմից անօդաչու տեխնոլոգիաների օգտագործումը եւ դրանց արտահանումը չեղարկելու մասին:
Նա նշել է, որ Կանադայի կառավարության հետաքննությունը հայտնաբերել էր, որ թուրքական Bayraktar TB2 դրոններն օգտագործվել են Ադրբեջանի կողմից Հայաստանի հետ հակամարտության ժամանակ, ինչի հետեւանքով վեցշաբաթյա ժամկետում սպանվել են հազարավոր մարդիկ: «Bayraktar անօդաչուները եղել են ադրբեջանական բանակի արսենալում ամենակարեւոր տարրը»:
Քիլֆորդի խոսքով՝ վիզուալիզացիայի համակարգերը, որոնք արտադրվում են կանադական Wescam ընկերության կողմից, Bayraktar դրոնների կարեւորագույն մասն են, սակայն Կանադան արտոնագրել է տեխնոլոգիան միայն այն պայմանով, որ այն կկիրառվի ինքնապաշտպանության համար:
Քիլֆորդը հիշեցրել է, որ դա առաջին դեպքը չէ, երբ Կանադայի կառավարությունը սահմանում է էմբարգո Թուրքիային զենք տրամադրելու համար. 1974 թվականին կառավարությունն այդօրինակ գործողություն էր ձեռնարկել, երբ թուրքական զինվորականները ներխուժել էին Կիպրոս՝ շրջափակելով կղզու հյուսիսային մասը: