Բրիտանիայում տեղի է ունենում արքայազն Ֆիլիպին հրաժեշտի արարողությունը
Հուղարկավորությունը Վինձորի ամրոցում սկսվել է հենց այն ժամանակ, երբ արքայազն Չառլզը եւ արքայազն Ուիլյամը իրենց կանանց հետ ժամանել են թագուհուն այսօր աջակցելու համար, երբ նա հրաժեշտ է տալիս իր ամուսնուն: Այս մասին հայտնում է Daily Mail-ը:
Եղիսաբեթ Երկրորդի եւ արքայազն Ֆիլիպի ամուսնությունը տեւել է 73 տարի, նրանք ունեն չորս երեխա, ութ թոռ, եւ շուտով լույս աշխարհ կգա նրանց 11-րդ ծոռը: Հուղարկավորությանը ներկա են բոլոր երեխաներն ու թոռները, բայց ոչ ծոռները:
Դագաղին ուղեկցում են թափորի մասնակիցները՝ արքայազնի եւ թագուհու որդիները, թոռները, արքայազներ Ուիլյամը եւ Հարրին (անցյալ շաբաթվա վերջին Հարրին Կալիֆորնիայից վերադարձել է Բրիտանիա եւ ինքնամեկուսացման մեջ էր մինչ թաղման օրը), ինչպես նաեւ արքայական ընտանիքի այլ անդամներ եւ արքայազն Ֆիլիպի պալատի աշխատակիցներ:
Արեւոտ Վինձորի ամրոցում, որը լքված է եւ բազմություն չի ընդունում, քառանկյունը լցված է նվագախմբերով, որոնք նվագում էին արքայազնի սիրած երգերն ու օրհներգերը, ներառյալ Երուսաղեմը, երբ նրա Land Rover մակնիշի անսովոր դիակառքը ժամանեց դուքսի գնդերի բարձրաստիճան սպաների ուղեկցությամբ:
Զորքերը գլուխները խոնարհած էին, երբ Land Rover-ը, որի վրա պետք է տեղադրվի դագաղը, մտավ քառանկյունի իսկ ռազմական նվագախմբերը նվագում էին երաժշտություն, որ դուքսն ինքն էր ընտրել:
Արքայազն Ուիլյամը եւ Հարրին ավելի քան մեկ տարվա ընթացքում առաջին անգամ են միասին ներկայացել հանրությանը՝ վերամիավորվելով իրենց պապ Ֆիլիպի հուղարկավորության ժամանակ: Եղբայրները կողք կողքի չէին Էդինբուրգի դուքսի դագաղի ետեւում, երբ քայլում էին ամրոցից դեպի Սուրբ Ջորջի մատուռ, այլ գտնվում էին իրենց զարմիկ Փիթեր Ֆիլիպսի երկու կողմերում:
Արարողությունը հեռարձակվում է բրիտանական հեռուստատեսությամբ եւ անցկացվում է հակավիրուսային անվտանգության կանոններին համապատասխան: Դրան մասնակցում են բրիտանական բանակի, ռազմաօդային ուժերի, նավատորմի եւ թագավորական ծովային հետեւակայինների մեծ թվով անդամներ: Սովորական բրիտանացիներին խնդրել են արարողության ժամանակ մեքենայով չմոտենալ ամրոցին: Թագավորական ընտանիքին ցավակցելու համար բացվել է հատուկ կայք:
