Վարչապետը Զանգեզուրով միջանցք տալու անհնարինության մասին է խոսել. Ես կարծում եմ, որ Մեղրիով որեւէ միջանցք Ադրբեջանին չի տրվելու: Այս մասին, այսօր՝ ապրիլի 19-ին, ԱԺ-ում լրագրողների հետ զրույցում ասաց ԱԺ «Իմ քայլը» խմբակցության պատգամավոր Արմեն Խաչատրյանը:
«Ճանապարհները, այո, պետք է ապաշրջափակվեն, բայց ճանապարհներն ապաշրջափակելու գոնե 3-4 տարբերակ հաստատ կա: Այդ տարբերակներում ՀՀ-ն շատ շահեկան վիճակում է լինելու»,-ասաց նա:
Հարցին, թե ո՞րն է շահեկան տարբերակը, պատգամավորն արձագանքեց. «Հիմա քարտեզով ցույց չտամ, բայց կարող եմ ասել, որ Ալիեւի ուզածը, որ իր պատկերացմամբ, պետք է միջանցք տրամադրվի Նախիջեւանը Մեղրիով կարճ Ադրբեջանին կապելու համար, դա ընդունելի չէ եւ չի լինելու»:
Նա հավելեց, որ Ալիեւը, երբ խոսում է Զանգեզուրում ներդրումների մասին, իր խնդիրն է մեր հասարակությանը լարվածության մեջ պահել, փորձել վախեցնել. «Ալիեւը իր պոռոտախոսությունից, ցինիզմից առաջ թող նախ պատասխանի, թե իր պապերը որ երկրում են ծնվել, այդ երկրի անունն ինչ է եղել: Այդ ժամանակ Ադրբեջան չի էլ եղել: Հետո նոր մտածի՝ Զանգեզուրը ում տարածքն է: Ալիեւը, այսօր աչքի է ընկնում պոռոտախոսությամբ ու ցինիզմով, եւ իմ կարծիքով իր մոտ հոգեկան խանգարման երեւույթներ կան»,-ընդգծեց «Իմ քայլի» պատգամավորը: