Եվրամիությունը գործարկել է կայք, որտեղ քաղաքացիները քննարկում են 27 երկրների դաշինքի ապագան, քանի որ Բրիտանիայի դուրս գալը, կլիմայի փոփոխությունը, COVID-19 համավարակն ու աճող ազգայնականությունը ԵՄ-ին ստիպում են մտածել հետագա զարգացումների մասին, հաղորդում է Reuters-ը:
ԵՄ 24 պաշտոնական լեզուներով հրապարակման համար մատչելի կայքէջը մաս է կազմում այն բանի, ինչը ԵՄ հաստատություններն անվանում են «Եվրոպայի ապագայի մասին» համաժողով՝ քննարկումների ֆորում, որն օգնում է բացահայտել խնդիրները, որոնք ԵՄ-ն պետք է լուծի փոփոխվող գլոբալ համատեքստում:
«Համաժողովի եզրակացությունները ապագայում կարող են հիմք հանդիսանալ Միությունում բարեփոխումների համար»,- ասուլիսում հայտարարել է նախաձեռնության առաջնորդներից մեկը, Եվրախորհրդարանի անդամ եւ Բելգիայի նախկին վարչապետ Գի Վերհոֆշտադտը: «Անհրաժեշտ է նոր ուղղություն: Այս համաժողովը կարող է պատասխան տալ»,- ասել է նա: Քննարկումների արդյունքներով եզրակացությունները պետք է ներկայացվեն 2022-ի երկրորդ եռամսյակում:
Կայքում անցկացվում են քննարկումներ այնպիսի թեմաների շուրջ, ինչպիսիք են կլիմայի փոփոխությունը, շրջակա միջավայրը, առողջությունը, տնտեսությունը, սոցիալական արդարությունը եւ աշխատատեղերը, ԵՄ դերը աշխարհում, արժեքներն ու իրավունքները, օրենքի գերակայությունը, անվտանգությունը, թվային վերափոխումը, ժողովրդավարությունը եւ միգրացիան: Քաղաքացիները կարող են շրջանառել իրենց սեփական թեմաները:
