Նիկոլ Փաշինյանը Սյունիքի մարզի Կապան քաղաքում է։ Մարզպետարանի շենքի դիմաց հավաքվել են Փաշինյանին աջակցողներն ու նրա դեմ բողոքողները։

Փաշինյանի դեմ բողոքի ակցիայի իրականացնելու ընթացքում քաշքշուկ տեղի ունեցավ երկու կողմերի միջեւ։ Միջադեպը հանդարտեցրին ոստիկանները։

Նշենք, որ Նիկոլ Փաշինյանն այսօր՝ ապրիլի 21-ին Ագարակ եւ Մեղրի քաղաքներից հետո այցելել է մարզկենտրոն Կապան: Այստեղ քաղաքի բնակիչները հավաքվել են եւ իրենց բողոքը հայտնել Փաշինյանի այցի կապակցությամբ:

Նրանք հայհոյանքներ էին հնչեցնում վարչապետի հասցեին ու վանկարկում. «Նիկոլ դավաճան», «Նիկոլ հողատու»:

Ավելի վաղ NEWS.am-ը հայտնել էր, որ ապրիլի 20-ին վարչապետ Նիկոլ Փաշինյանը խիստ գաղտնի պայմաններում ուղեւորվել է Սյունիքի մարզ։ Նրա այցի մասին տեղեկությունը խիստ գաղտնի է պահվել, ուժայիններն այդ մասին իմացել են վերջին պահին, նույնիսկ ճանապարհային ոստիկանությանն ընդամենը կես ժամ առաջ են տեղեկացրել, որ պետք է ուղեկցեն վարչապետին։