Ես համոզված եմ, որ հանրությունն ամբողջովին իր հարցերի պատասխանն ստացել է, իսկ մի որոշ խմբակ կարող է շարունակել ասել, որ դա հարցերի պատասխանը չի տվել: Այս մասին, այսօր՝ ապրիլի 22-ին, ԱԺ-ում լրագրողների հետ զրույցում նշեց ԱԽ քարտուղար Արմեն Գրիգորյանը՝ անդրադառնալով ԱԽ նիստերի արձանագրությունների բացահայտմանը, որը վերաբերում է ԳՇ նախկին պետ Օնիկ Գասպարյանին:
«Ես խորհուրդ եմ տալիս մեր հրապարակումները առանձին չկարդալ: Մեր հայտարարությունները կարդալու համար պետք է բացել Օնիկ գասպարյանի նոյեմբերի 17-ի հայտարարությունը, բոլոր տողերը կարդալուց հետո բացել մեր գաղտնազերծված հատվածները: Օրինակ, նա ասում է, որ հունիսի 8-ին նշանակվելուց մի քանի օր հետո ԱԽ-ին եմ ներկայացրել ռազմաքաղաքական, տարածաշրջանային իրավիճակը: բացում ենք ԱԽ նիստի օրակարգը, տեսնում ենք, որ Օնիկ Գասպարյանը զեկույց չունի: Հասկանում ենք, որ սուտ է ասել:
Անցնում ենք մյուս հարցերին, երբ ասում է՝ ես ասել եմ պատերազմը 2-3 օրում կանգնեցրեք: Դուք հասկանում եք, չէ՞, որ նման առաջարկ անող գեներալ-լեյտենանտը չի կարող ասել, որ Ջաբրայիլում հաջողություններ ունենք, չի կարող ասել՝ թշնամին որեւէ առաջընթաց չունի: Այսինքն ես կարող եմ հասկանալ, որ նույնիսկ դիրք չեն գրավել: Ո՞նց կարող է Օնիկ Գասպարյանը իր տեքստում ասի՝ 2-3 օրում կանցնեցրեք պատերազմը, որը սուտ է եւ իր զեկույցում ասի՝ թշնամին որեւէ առաջընթաց չի ունեցել, Ջաբրայիլի ուղղությամբ հաջողություններ ունենք, հայտարարի, որ բանակն իր խնդիրները կատարում է եւ շարունակելու է կատարել: Այսինքն մեր հրապարակած տեքստը բավարար է, որպեսզի մեր հանրությունը համապարփակ հասկանա, թե ինչ է տեղի ունեցել: Եթե մենք ամբողջ տեքստն էլ հրպարակենք, կարող է այդ խմբակը ասի՝ վիդեոն էլ հրապարակենք, որ տեսնեբնք, թե ով ինչքան ջուր է խմել»,-հայտարարեց Արմեն Գրիգորյանը:
Նա ընդգծեց, որ պատերազմի ընթացքում Օնիկ Գասպարյանի հետ կապված որեւէ խնդիր չի առաջացել, բորոլ խնդիրներն առաջացել են պատերազմից հետո՝ նոյեմբերի 17-ից սկսած:
«Էլի շատ շահարկումներ են եղել, բոլոր շահարկումներին պատասխանելու ենք եւ հստակություն ենք մտցնելու»,-ասաց նա: