Վարչապետը որեւէ տուն չի մտել առանց թույլտվության եւ չեմ կարծում, որ դա հնարավոր կլիներ անել: Այս մասին, այսօր՝ ապրիլի 23-ին, ԱԺ-ում լրագրողների հետ զրույցում հայտարարել է «Իմ քայլը» խմբակցության ղեկավար Լիլիթ Մակունցը՝ անդրադառնալով Սյունիքի մարզի Շուռնուխ գյուղում վարչապետ Նիկոլ Փաշինյանի անակնկլ այցին բնակիչներից մեկի տուն:
Ինչ վերաբերում է առաջին նախագահ Լեւոն Տեր-Պետրոսյանի հայտարարությանը, թե «Սյունյաց արշավանքի ամենանողկալի դրվագը ուշ երեկոյան, առանց թույլտվության, նրա ներխուժումն էր շուռնուխեցի մի կնոջ բնակարան», Մակունցն ասաց. «Այն մեկնաբանությունը, որը տվել է առաջին նախագահը, չի համապատասխանում իրականությանը»:
Ավելի վաղ NEWS.am-ը հայտնել էր, որ Լեւոն Տեր-Պետրոսյանը անդրչադառնալով վարչապետի Սյունիք այցին, գրել էր. «Ինձ համար Փաշինյանի Սյունյաց արշավանքի ամենանողկալի դրվագը ուշ երեկոյան, առանց թույլտվության, նրա ներխուժումն էր շուռնուխեցի մի կնոջ բնակարան: Ավելի նվաստացուցիչ վիճակում չէի ուզի տեսնել երկրիս վարչապետին, որի պատկերացումը քաղաքացու իրավունքների մասին, ցավոք, չի տարբերվում ճորտատիրոջ պատկերացումից»:
Հիշեցնենք, որ Շուռնուխի բնակիչ կինն ինքը NEWS.am-ի հետ հարցազրույցում նշել էր, որ ինքը չի ցանկացել, որ վարչապետն իրենց տուն մտնի, բայշ տունը շրջապատել են եւ Փաշինյանը մտել է ներս: