Ապրիլի 23-ին Անվտանգության խորհրդի քարտուղար Վիտալի Բալասանյանը Արցախի պետական համալսարանի ղեկավարության նախաձեռնությամբ հանդիպել է ԲՈՒՀ-ի պրոֆեսորադասախոսական կազմի և ուսանողության ներկայացուցիչների հետ։

Համալսարանից NEWS.am-ին հայտնում են, որ անդրադարձ կատարելով արցախյան ազատագրական պայքարի շրջափուլերի նշանակալի ռազմաքաղաքական իրադարձություններին՝ Վիտալի Բալասանյանը հանդես է եկել 2020 թվականի 44-օրյա պատերազմին, ռազմագործողությունների դադարից հետո ստեղծված իրավիճակին՝ կարևորելով հետպատերազմական ծանր ժամանակաընթացքը համախմբված, պատվով հաղթահարելու և արժանապատիվ ապագայի կառուցման գործում հատկապես երիտասարդության ներուժի օգտագործումը։

Համալսարանականները հանդես են եկել իրենց հուզող տարատեսակ հարցերով, որոնց տրվել են բովանդակալից պատասխաններ։

Հանդիպմանը համալսարանի ռեկտորը Անվտանգության խորհրդի քարտուղարին է հանձնել ԱրՊՀ հիմնադրման 5-ամյակի հուշամեդալ։