Գորիսի փոխքաղաքապետ Մենուա Հովսեփյանը քիչ առաջ դուրս եկավ Քննչական կոմիտեից։
Նա NEWS.am-ի հետ զրույցում պատմեց՝ ինչ քննչական գործողություններ են իրականացվել իր նկատմամբ։
«Գորիսի մեր տնից են ինձ բերման ենթարկել, բերել են Քննչական կոմիտե, հետո այստեղից չգիտես՝ ինչու տեղափոխել են Երեւան քաղաքի վարչություն, այնտեղ մի պղծված անձնավորություն, հետո կհայտարարեմ՝ ով էր այդ մարդը, պաշտոնավոր, ոչ ոստիկան, նման մարդկանց ես ոստիկան կոչել չեմ կարող, որոշ չափով այլանդակություն թույլ տվեց իմ նկատմամբ։ Դրա պատասխանն իրենք օրենքի դաշտում պետք է տան, եթե օրենքի դաշտում չտան, այդ ամենից հետո նոր ես կխոսեմ այդ մասին։ Ինչ վերաբերում է այս իմիտացիոն շոուներին, որոնք իրականացվում են մեր իշխանությունների կողմից, ես ուզում եմ «ողջույն հղել» մեր շոումենիստ, շոու սիրող կեղծիքի եւ ստի մեջ շաղախված վարչապետին, ուզում եմ եւս մեկ անգամ ասել, որ նման ձեւով, պահվածքով ոչ հարիր հային, առավել եւս տղամարդուն հարցեր չեն լուծում։ Այսինքն՝ ինքն ուզում է նման ձեւով սյունեցուն ասել, որ ամեն ինչ նորմալ է, դուք պետք է այսպես հարմարվեք, Սյունիքն էլ վաղ կհանձնեմ, ամեն ինչ նորմալ կլինի։ Եւս մեկ անգամ ես հաստատում եմ, որ մենք թույլ չենք տալու»,- ասաց Հովսեփյանը։
Նա համոզմունք հայտնեց, որ այն, ինչ կատարվել է այս երկու օրվա ընթացքում, իր իրավական գնահատականը ստանալու է. «Մենք սպասում ենք դրան։ Եթե չստացավ իրավական գնահատական, ապա այլ մեխանիզմներով մենք կփորձենք հարցը լուծել»։
Փոխքաղաքապետը պատմեց, որ իրեն բերման ենթարկելիս չեն ասել՝ որն է պատճառը. «Ես երեկ՝ ժամը 18։00-ից հետո եմ իմացել՝ ինչի համար են բերման ենթարկել։ Մինչեւ այդ ամեն ինչը հեքիաթային ֆիլմի էր նման, ոչ մեկ չէր ասում՝ ինչ է կատարվում իրականում»։
Անդրադառնալով իրեն առաջադրված մեղադրանքին՝ Հովսեփյանն այն անվանեց անհեթեթություն. «Հերթական խեղկատակությունն է, շոուն է, որը ցուցադրում է մեր իշխանությունը՝ փորձելով ուժի միջոցով ինչ-որ բան ճնշել։ Սյունեցի տղամարդը պահելու է իր արժանապատվությունը»։
Նա պնդեց, որ քրեական գործը շինծու է. «Ես գիտեմ, որ բոլորին բաց են թողնելու, քանի որ գործը շինծու է, գործը կարելուց էլ գրագետ չի կարվել»։
Փոխքաղաքապետն անդրադառնալով իշխանության ներկայացուցիչների այն պնդումներին, որ Սյունիքում տեղի ունեցած ակցիաները որոշակի շրջանակներին սպասարկող մարդիկ էին կազմակերպել, ասաց. «Ուղղակի անհեթեթություն է, բացարձակ սուտ է։ Նման խեղաթյուրված մտքերին ես անիմաստ եմ համարում պատասխանելը։ Ի՞նչ են ուզում, այսինքն՝ գան ու մեղրեցին չխոսի՞, ի՞նչ եք անում»։
Անդրադառնալով իմքայլական Արմեն Խաչատրյանի այն դիտարկմանը, որ սյունեցիները չեն կարող խուլիգան լինել, Մենուա Հովսեփյանն արձագանքեց. «Ես «Իմ քայլից» սյունեցի պատգամավոր չեմ ճանաչում, որովհետեւ վերջին ժամանակներս իրենք իրենց սյունեցուն վայել չեն դրսեւորում։ Կարեն Համբարձումյանն էլ վերջերս հայտարարում էր, որ սյունեցուն միշտ էլ ապրել է ադրբեջանցիների հետ»։
Հիշեցնենք, որ Երեւանի ընդհանուր իրավասության դատարանը՝ դատավոր Դավիթ Բալայանի նախագահությամբ, այսօր՝ ապրիլի 23-ին, բավարարել է Գորիսի փոխքաղաքապետ Մենուա Հովսեփյանին ձերբակալելու մասին որոշման դեմ բողոքը՝ ոչ իրավաչափ ճանաչելով նրա ձերբակալությունը։
Հովսեփյանի նկատմամբ խափանման միջոց է ընտրվել ստորագրությունը՝ չհեռանալու մասին։
Հիշեցնենք, որ Մենուա Հովսեփյանի պաշտպան Դավիթ Կարապետյանը ՀՔԾ հաղորդում է ներկայացրել` նշելով, որ երեկ նրան ապօրինի բերման են ենթարկել ՀՀ քննչական կոմիտե, որտեղ ենթադրաբար ղեկավար աշխատակիցներից մեկի հրահանգով պատճառվել են մարմնական վնասվածքներ։
Նշենք, որ ապրիլի 22-ին, կեսգիշերն անց Մենուա Հովսեփյանին ոստիկանները բերման են ենթարկել։
Մենուա Հովսեփյանը նախօրեին այլ բնակիչների հետ եւս մասնակցել էր վարչապետ Նիկոլ Փաշինյանի դեմ իրականացվող բողոքի ակցիաներին։
Նշենք, որ ոստիկանները բերման էին ենթարկել նաեւ Մեղրի խոշորացված համայնքի ղեկավար Մխիթար Զաքարյանին եւ Շուռնուխ համայնքի նախկին ղեկավար Արարատ Աղաբեկյանին։ Մխիթար Զաքարյանը ձերբակալվել է։
