ԱՄՆ Ներկայացուցիչների պալատի անդամ Ադամ Շիֆը հայտարարություն է արել` կապված Հայոց ցեղասպանության վերաբերյալ ԱՄՆ նախագահ Ջո Բայդենի հայտարարության հետ:
«Հայկական ծագմամբ ամերիկացիների եւ բոլոր նրանց համար, ովքեր հավատում են մարդու իրավունքներին եւ ճշմարտությանը, այսօր պատմական հանգրվան է՝ նախագահ Բայդենը մարտահրավեր նետեց թուրքական սպառնալիքներին եւ 1,5 միլիոն հայերի կոտորածը ճանաչեց որպես 20-րդ դարի առաջին ցեղասպանություն: Նման կերպ վարվելով՝ նա դեն նետեց ամոթալի լռության ու կիսաճշմարտության տասնամյակները, ինչպես նաեւ իր նախորդներից շատերի չկատարած խոստումները եւ ճշմարտությունն ասաց իշխանություններին։
Սա նշանակալի օր է հայազգի իմ հազարավոր ընտրողների համար, ովքեր ամբողջ կյանքում աշխատել, պաշտպանել եւ աղոթել են ճանաչման համար, եւ ինձ ոգեշնչում է այն, որ այս հայտարարությունն արվեց այն ժամանակ, երբ դեռ կան ցեղասպանությունը վերապրած մարդիկ»,- ասել է Շիֆը:
Շիֆը ավելի քան քսան տարի ղեկավարել է Հայոց ցեղասպանությունը պաշտոնապես ճանաչելու Կոնգրեսի ջանքերը, եւ այս տարի ղեկավարել է Կոնգրեսի ավելի քան 100 անդամներից բաղկացած երկկուսակցական խումբը՝ կոչ անելով նախագահ Բայդենին կատարել այս պատմական քայլը:
