Իսրայելը մշակում է մարտադաշտում ավտոմատ գրոհների համար արհեստական բանականության «սուպերուղեղ», որը բազմաթիվ հաղորդիչներ է օգտագործում, որպեսզի օգնի տանկերին եւ ռոբոտներին պարեկություն իրականացնել մարտի դաշտերում եւ գտնել թշնամու թիրախները:
Արհեստական բանականությունը, որն ի պատիվ պատերազմի հունական աստվածուհու, Աթենա (Athena) է կոչվել, Israel Aerospace Industries (IAI)-ում մշակման վաղ փուլում է, բայց կարող է գործարկվել հաջորդ տասնամյակում:
Daily Telegraph-ը Athena ծրագրին, այդ թվում՝ մարտական սցենարում տանկերի կողմից օգտագործվող «ուղեղի» մոդելավորված ցուցադրմանը, բացառիկ հասանելիություն է ստացել:
Այս սցենարում իսրայելական Carmel տանկերը հագեցած են եղել սմարթֆոնների չափի ԱԲ-ով, որը տվյալներ է հավաքել ինֆրակարմիր եւ ռադարային հաղորդիչներից, այդ թվում` որպեսզի նշի հակառակորդի կործանիչները, որոնք թաքնված են եղել գետնի տակ եւ ռազմի դաշտում գտնվող շենքերում: Մեկ ակնթարթում տվյալները փոխանցվել են հրամանատարին եւ վերածվել են «մարտական ընտրացանկի»՝ թիրախների հարձակման լավագույն մեթոդներով:
Athena-ն կարող է նաեւ միացված լինել տանկի կրակի կառավարման եւ մանեւրման համակարգերին, ինչը թույլ կտա նրան ավտոմատ կերպով հարձակվել թիրախների վրա, թեեւ վերջնական որոշումը հրամանատարն է կայացնում:
Իսրայելական IAI պետական պաշտպանական ընկերությունը քննարկում է նաեւ Athena-ն ռոբոտային մեքենաների վրա տեղադրելու հնարավորությունը, որոնք կարող են ավտոմատ կերպով պարեկություն անցկացնել սահմանային ցանկապատերի մոտ` չարագործներին որոնելու համար:
Երկիրը հույս ունի, որ ԱԲ-ի պաշտպանական համակարգերը իր բանակն ավելի մարտունակ կդարձնեն, քանի որ մեքենաները կարող են վերլուծել ռազմի դաշտը եւ մարտավարական մարտական պլան մշակել շատ ավելի արագ, քան մարդկային միտքը:
Իսրայելի պաշտպանության ուժերի բարձրաստիճան սպաները, ովքեր նույնպես ուսումնասիրում են արհեստական բանականության օգտագործումը, հայտարարել են, որ տեխնոլոգիայի որոշ գործոններ արդեն հաջորդ տարի կարող են պատրաստ լինել իրական աշխարհում օգտագործման համար:
