Ժամանակն է մտածել, թե պե՞տք է արդյոք Twitter-ը շարունակի բացառություններ անել աշխարհի առաջնորդների հակասական գրառումների համար: Այս մասին հայտարարել է Մեծ Բրիտանիայում Twitter-ի քաղաքականության բաժնի ղեկավար Քեթի Մինշալը՝ ելույթ ունենալով Լորդերի պալատի կապի եւ թվային տեխնոլոգիաների հանձնաժողովում, հայտնում է AP-ը:
Twitter-ը ներկայումս վերանայում է իր քաղաքականությունը քաղաքական գործիչների եւ պետական պաշտոնյաների նկատմամբ, ինչը թույլ է տալիս որոշակի բովանդակությանը, որը խախտում է կանոնները, մնալ հարթակում՝ նախազգուշական գրառումներով:
Ընկերությունը պնդում է, որ այսպիսի մոտեցումը բխում է հասարակության շահերից՝ թույլ տալով մարդկանց ուշադիր ուսումնասիրել, թե ինչ են ասում համաշխարհային առաջնորդները, բայց մարտին սկսվել են հանրային խորհրդակցություններ, որպեզի որոշեն՝ արժի՞ արդյոք ապագայում նման բացառություններ անել:
Հարց է առաջանում, թե ինչու ԱՄՆ նախկին նախագահ Դոնալդ Թրամփին ընդմիշտ արգելվել է մուտք գործել հարթակ՝ հունվարին Կապիտոլիումում տեղի ունեցած անկարգություններից հետո, իսկ Իրանի գերագույն առաջնորդ Այաթոլլա Ալի Խամենեիի հաշիվները մնացել են՝ Իսրայելի հասցեին նրա կողմից բազմաթիվ սպառնալիքներից հետո: Մասնավորապես, անցյալ տարվա հունվարին Խամենեին Twitter-ում գրել էր. «Սիոնիստական ռեժիմը քաղցկեղային ուռուցք եւ վնաս է այս տարածաշրջանի համար: Այն, անկասկած, արմատախիլ կարվի ու կոչնչացվի»:
«Մենք խոստովանում ենք, որ երբեմն համաշխարհային առաջնորդը կարող է թվիթել ինչ-որ բան, որը խախտում է մեր կանոնները, բայց կա հանրային հետաքրքրություն` իմանալու, որ այս համաշխարհային առաջնորդը հենց դա է ասել:
2019-ին մենք հայտարարել էինք, որ այս դեպքերում նման թվիթները պիտակներով կնշենք:
Ինչ վերաբերում է Այաթոլլա Խամենեիի թվիթներին, մենք հայտարարել ենք, որ երբ խոսքը վերաբերում է այն թվիթներին, որոնք կարող են դիտվել որպես զենքի սպառնալիք, որոնք ուղղված են այլ կառավարություններին, որոնք կարող են կենտրոնանալ ռազմական կամ աշխարհաքաղաքական հարցերի վրա, մենք որոշել ենք պահպանել այդ թվիթերը: Դա երկու պատճառ ունի: Նախ` հաշվի առնելով այս առաջնորդի ասածի նկատմամբ հասարակության հետաքրքրությունը, եւ երկրորդ` որպեսզի մարդկանց հնարավորություն տանք այս ղեկավարին պատասխանատվության ենթարկել իր խոսքերի համար:
Անցել է երկու տարի, եւ այժմ ժամանակն է ստուգելու՝ ճի՞շտ մոտեցում է արդյոք դա: Մենք պատասխանատվություն ենք կրում այն բանի համար, որ Twitter-ը միանձնյա վարվելակարգի կանոններ չսահմանի նման հիմնարար խնդրի վերաբերյալ, այդ իսկ պատճառով մենք անցկացնում ենք հանրային խորհրդակցություններ, հրավիրում ենք պետական պաշտոնյաների, իրավապաշտպանների, անվտանգության փորձագետների՝ աշխարհի տարբեր երկրներից, որպեսզի նրանք պատմեն մեզ, թե, իրենց կարծիքով, ինչպես մենք պետք է չափավորենք համաշխարհային առաջնորդների բովանդակությունը»: