ՀՅԴ-ական գործիչները հրավիրվել էին Երեւան քաղաքի քննչական վարչություն՝ ի աջակցություն ձերբակալված սյունեցիների՝ Դատախազության դիմաց իրականացրած բողոքի ակցիայի շրջանակում՝ վկայի կարգավիճակով։ Այս մասին այսօր՝ ապրիլի 29-ին, Երեւան քաղաքի քննչական վարչության շենքի դիմաց լրագրողներին հայտնեց ՀՅԴ անդամ Արծվիկ Մինասյանը։
«Գնահատել եմ, որ դա քրեական հետապնդման քողի տակ իրականացվող քաղաքական հետապնդում է։ Օգտվելով Սահմանադրությամբ ինձ ընդձեռնված հնարավորությունից՝ հրաժարվել եմ ցուցմունք տալուց»,- նշեց նա։
Մինասյանի գնահատմամբ՝ այս քրեական գործը հեռանկար չի կարող ունենալ.
«Այնքան արհեստական է, այնքան ակնհայտ քաղաքական ենթատեքստ ունի իր մեջ, որ ոչ միայն ապագա չունի, այլ այս գործը պիտի գլխի վրա շուռ գա, եւ մեղադրանքներ պիտի առաջադրվեն այն պետական պաշտոնյաներին, որոնք իրենց անգործությամբ ստեղծել են այս վիճակը երկրում, սկսած դատախազությունից, ավարտված քննչական մարմիններ։ Կյանքն էլ է ցույց տվել, որ երբ արդեն պետք է հեռանա այս իշխանությունը կամ զրկվի իշխանությունից, այսպիսի տարաբնույթ քրեական գործեր է փորձում հարուցել, մարդկանց կալանավորել եւ այլն»։
Մինասայնը նշեց, որ մասնակցելու են այսօր 17։00-ին դատախազության մոտ սպասվող ակցիային ու ամոթի խոսքեր են ուղղելու դատախազությանը, որ չի կատարում սահմանադրական իր պարտավորությունները, փոխարենը ծառայում է օրվա իշխանությանը։
Նշենք, որ հարցաքննության էին հրավիրվել նաեւ Գեղամ Մանուկյանն ու Գերասիմ Վարդանյանը։
Նրանք նույնպես վկայի կարգավիճակով էին հարցաքննվել։
Հիշեցնենք, որ այդ առնչությամբ փաստաբան Բենիկ Գալստյանը ֆեյսբուքյան իր էջում գրել էր, որ նրանց հարցաքննության կանչելը պայմանավորված է ՀՀ գլխավոր դատախազության մոտ այսօր բողոքի ակցիա կազմակերպելով։
Փաստաբան Գալստյանի այդ գրառման վերաբերյալ դատախազի խորհրդական Գոռ Աբրահամյանը գրել էր, որ նրանք քննչական գործողությանը իրենց մասնակցության մասին տեղեկացված են եղել դեռեւս ապրիլի 27-ից, ինչը նշանակում է, որ չի կարող ծանուցագրերի փոխանցումը, հարցաքննությունների հրավիրվելը որեւէ կերպ պայմանավորված լինել Դատախազության առջեւ նախատեսված ակցիայի հետ: