Սպիտակ տունը հաստատել է, որ ԱՄՆ-ը պաշտոնապես սկսել է Աֆղանստանից ամերիկյան զորքերը դուրս բերելու գործընթացը՝ նախագահ Ջո Բայդենի կարգադրության համաձայն:
«Թվաքանակի կրճատում է տեղի ունենում»,- լրագրողներին ասել է Սպիտակ տան մամուլի քարտուղար Կարին Ժան Պիեռը:
Ինչպես հայտնում է AFP-ն, ՆԱՏՕ-ն նույնպես սկսել է իր առաքելության դուրսբերումը Աֆղանստանից:
ԱՄՆ-ի կողմից աջակցվող դաշինքի անդամներն այս ամիս համաձայնել են ավարտել իրենց 9600 հոգանոց առաքելությունն Աֆղանստանում այն բանից հետո, երբ Բայդենը կոչ է արել վերջ դնել ԱՄՆ-ի ամենաերկար պատերազմին: «Ապրիլի կեսերին ՆԱՏՕ-ի դաշնակիցները որոշել են մինչեւ մայիսի 1-ը սկսել «Վճռական աջակցություն» առաքելության ուժերի դուրսբերումը, եւ այդ գործընթացն արդեն սկսվել է: Դա կլինի կարգավորված, համակարգված եւ կանխամտածված գործընթաց»,- AFP-ին ասել է ՆԱՏՕ-ի ներկայացուցիչը: Նրա խոսքով՝ դաշինքի զորքերի անվտանգությունը «գերխնդիր կլինի ճանապարհի յուրաքանչյուր փուլում, եւ մենք ձեռնարկում ենք բոլոր անհրաժեշտ միջոցները՝ մեր անձնակազմին պաշտպանելու համար»: «Դուրսբերման ընթացքում թալիբների ցանկացած հարձակում վճռական պատասխանի կհանդիպի: Մենք նախատեսում ենք մի քանի ամսվա ընթացքում ավարտել դուրսբերումը»,- ասել է պաշտոնյան՝ հրաժարվելով մանրամասներ ներկայացնել ժամկետների վերաբերյալ:
Ավելի վաղ Բայդենը հայտարարել էր, որ ԱՄՆ զորքերի դուրսբերումը կավարտվի սեպտեմբերի 11-ին՝ Ամերիկայում հայտնի ահաբեկչությունների քսաներորդ տարեդարձի օրը:
Գերմանիայի պաշտպանության նախարարությունը հայտնել է, որ նախատեսում է մինչ հուլիսի սկիզբը երկրից դուրս բերել իր 1300 զինծառայողներին։