Թուրքիայի ոստիկանությունը բերման է ենթարկել «Իսլամական պետություն» ահաբեկչական խմբավորման անդամին, որը դրա ղեկավար, երկու տարի առաջ ոչնչացված Աբու Բաքրա ալ Բաղդադիի շրջապատում առանցքային դերակատարներից մեկն է, հաղորդում է ՌԻԱ Նովոստի-ն:
Գործողությունն անցկացվել է թուրքական ոստիկանության եւ Ստամբուլի Աթաշեխիր շրջանում ազգային հետախուզական կազմակերպության աշխատակիցների համատեղ ջանքերով: Ահաբեկիչը, որի նկատմամբ երկար ժամանակ հսկողություն էր սահմանվել, բերման է ենթարկվել տնից դուրս գալու պահին: Ոստիկանությունը խուզարկել է բնակարանը, որտեղ ապրում էր հանցագործը, եւ առգրավել բջջային հեռախոսներ, թվային նյութեր ու լուսանկարներ, որոնցում ահաբեկիչը պատկերված է՝ թուրը վեր պահած:
Ահաբեկիչը, որը ներթափանցել էր Թուրքիա կեղծ փաստաթղթերով երեք տարի առաջ, եւ այնուհետեւ ամբողջ ընթացքում որոնվում էր ինտերպոլի կողմից, պատասխանատու էր խմբավորման ռազմական ենթակառուցվածքի համար եւ ներգրավված էր Սիրիայում բազմաթիվ ահաբեկչություններում՝ սկսած 2014 թվականից, ինչպես նաեւ զբաղվում էր ահաբեկիչների ուսուցմամբ:
