Իրանը չորեքշաբթի հայտարարել է անցյալ տարի մահացած Իրանի առաջատար միջուկային ֆիզիկոս Մոհսեն Ֆախրիզադեի պատվին կոչված իր սեփական «Ֆահրա» կորոնավիրուսի դեմ պատվաստանյութի հաջող փորձարկման մասին: Որպես կամավոր մասնակցել է գիտնականի որդին, հաղորդում է IRNA-ն:
Մարտին մեկնարկել էին այս դեղամիջոցի առաջին կլինիկական փորձարկումները, որը մշակվել է Իրանի Պաշտպանության նախարարությանն առընթեր հետազոտական կենտրոնում՝ Ֆախրիզադեի գլխավորությամբ: Նա սպանվել էր անցյալ տարվա նոյեմբերի 27-ին Թեհրան նահանգում: Իրանի մեջլիսի (խորհրդարանի) ազգային անվտանգության եւ արտաքին քաղաքականության հանձնաժողովի պաշտոնական ներկայացուցիչ Աբոլֆազլ Ամույիի խոսքով՝ մահափորձը կազմակերպվել էր իսրայելական հատուկ ծառայությունների կողմից՝ այլ երկրների հետախուզական գործակալությունների հավանական ներգրավմամբ:
Իրանում կորոնավիրուսի դեմ մի քանի սեփական պատվաստանյութ է մշակվել: Ապրիլի վերջին սկսվել էր COV Iran Barakat պատվաստանյութի փորձարկումների երրորդ (վերջնական) փուլը: Ըստ կորոնավիրուսի դեմ պայքարի ազգային շտաբի գիտական կոմիտեի ղեկավար, դոկտոր Մոստաֆա Գանեայի՝ այս պատվաստանյութն օգտագործման համար կարող է հաստատվել մայիսին, իսկ սեփական մշակման մյուս դեղամիջոցները՝ եւս 2-3 ամիս անց: