Հնդկաստանի Ալլահաբադի բարձր դատարանը կարծում է, որ հիվանդանոցներում բժշկական թթվածնի պակասը, ինչը կորոնավիրուսային վարակով բազմաթիվ հիվանդների մահվան է հանգեցրել, տեղական իշխանությունների հանցագործությունն է, որը համեմատելի է ցեղասպանության հետ: Ինչպես հաղորդում է NDTV հեռուստաալիքը, այս քաղաքի բարձր դատարանի կոլեգիան (2018-ին Ալլահաբադ քաղաքը Պրայագրաջ էր վերանվանվել, սակայն բարձր դատարանը պահպանել էր անվանումը) հասարակական մեծ բողոքի ֆոնին բանաձեւ է ընդունել՝ բժշկական հաստատություններում թթվածնի պակասի հետ կապված մահվան դեպքերի վերաբերյալ դատավարություն սկսելու մասին:
«Կորոնավիրուսով հիվանդների մահը միայն հիվանդանոցներում թթվածնի պակասի պատճառով քրեական գործողություն է՝ ոչ պակաս, քան ցեղասպանություն նրանց կողմից, ովքեր պարտավոր են ապահովել հեղուկ բժշկական թթվածնի շարունակական պատրաստումն եւ մատակարարումը»,- մեջբերում է հեռուստաալիքը Ալլահաբադի դատավորներին:
«Ինչպե՞ս կարող ենք թույլ տալ մեր ժողովրդին մահանալ այսպես, երբ գիտությունն այնքան զարգացած է, որ այսօր սրտի փոխպատվաստումներ եւ ուղեղի վիրահատություններ են անցկացվում»,- նշել են դատավորները:
Հնդկաստանում կորոնավիրուսով վարակման դեպքերի թիվն օրական աճում է ավելի քան 300 հազարով: Բժշկական հաստատություններում թթվածնի եւ դեղամիջոցների սուր պակաս կա: