Նախատեսվում է Հայաստանում բանկային հաշիվների կենտրոնացված ռեգիստր ներդնել: Այս մասին ՀՀ ԱԺ նիստին «Կենտրոնական բանկի մասին» օրենքում լրացումներ կատարելու մասին» օրենքի նախագծի քննարկման ժամանակ ասաց ՀՀ Կենտրոնական բանկի նախագահի տեղակալ Ներսես Երիցյանը:
Նախագիծը, ըստ նրա, սահմանում է Հայաստանի Հանրապետությունում բանկային հաշիվների կենտրոնացված ռեգիստրի ներդրման նպատակները, որոշում է ռեգիստրում ներառվելիք տեղեկատվության չափը, ինչպես նաեւ տեղեկատվության տրամադրման կարգը եւ ռեգիստրում ներառման ենթակա տեղեկատվության ցանկը որոշելու Կենտրոնական բանկի խորհրդի լիազորությունները, այդ թվում՝ հաշվետվությունների:
«Ռեգիստրը ստեղծվել է Կենտրոնական բանկի նպատակների ու գործառույթների իրականացման, ինչպես նաեւ ազգային իրավասու մարմինների հետ համագործակցության արդյունավետության բարձրացման համար` «Բանկային գաղտնիքի մասին» օրենքով սահմանված կարգով: Ռեգիստրում պարունակվող տեղեկությունները կշարունակեն գաղտնի բանկային տեղեկատվություն համարվել, ուստի այն կարտացոլվի օրենքով արդեն նախատեսված կարգով: Ռեգիստրից տեղեկություններ ստանալու իրավունք ունեցող մարմինները մնում են նույնը: Դրանք այն մարմիններն են, որոնք լիազորված են բանկային գաղտնիք կազմող տեղեկատվություն ստանալ»,- պարզաբանեց Երիցյանը:
Ընդ որում, նախնական հաշվեկշռի, ընթացիկ շարժումների, վերջնական մնացորդի մասին տեղեկատվությունը չի հավաքվի եւ չի պահվի:
