Արտահայտելով ապակայունացնող դիրքորոշում՝ Ադրբեջանը կխոչընդոտի տարածաշրջանի ապաշրջափակման գործընթացին: Այս մասին մայիսի 5-ին Ազգային ժողովի նիստում հայտարարեց հանրապետության վարչապետի պաշտոնակատար Նիկոլ Փաշինյանը՝ պատասխանելով պատգամավորների հարցերին:
Հաղորդակցության ուղիների բացումը եւ Հայաստանի ապաշրջափակումը, նրա խոսքով, պետք է առաջնահերթություն լինեն երկրի իշխանությունների համար:
«Այս թեմայի շուրջ քննարկումներ են ընթանում: Կարծում եմ, որ Ադրբեջանը կշարունակի ապակայունացնող դիրք զբաղեցնել, տարբեր հայտարարություններ անել, անհեթեթ վախեր սերմանել մեր հասարակության մեջ, որպեսզի այդ ապաշրջափակումը տեղի չունենա»,- ասաց Փաշինյանը:
Վարչապետի պաշտոնակատարը նշեց, որ կառավարության ռազմավարական ուղղությունը Հայաստանի արտաքին անվտանգության ապահովումն է, որում հայ-ռուսական միացյալ զորախումբը եւ ՀՕՊ համատեղ համակարգը անկյունաքարային նշանակություն ունեն:
«Այս գործընթացի շարունակման արդյունքում մենք պետք է լրջորեն վերափոխենք մեր բանակը եւ ռազմավարական տեսանկյունից ունենանք արհեստավարժ բանակ: Մեր առջեւ խնդիր է դրված՝ ժողովրդագրական իրավիճակի էական փոփոխություն եւ կրթության որակի էական փոփոխություն»,- ասաց Փաշինյանը:
