Հայաստանում ապրիլին կատարված գործարքները 8,8 մլն հատով կամ 24 տոկոսով ավել են 2019-ի ապրիլի ցուցանիշներից: Այս մասին, այսօր՝ մայիսի 6-ին, կառավարության նիստում հայտարարեց ՀՀ վարչապետի պաշտոնակատար Նիկոլ Փաշինյանը՝ հավելեելով, որ համեմատությունը 2019-ի հետ է, ոչ թե 2020-ի, որովհետեւ նախորդ տարի կորոնավիրուսի վարակով պայմանավորված ցուցանիշները նվազել էին:
Նա նշեց, որ 2021-ի ապրիլին դրամաշրջանառության ծավալները 130 մլրդ դրամով կամ 26,6 տոկոսով ավել են 2019-ի տվյալներից:
«Սա բավականին լավ եւ էական ցուցանիշ է: Կարծում եմ՝ այս ցուցանիշները վկայում են, որ տնտեսական դինամիկան վերականգնման փուլում է: Կարեւոր եմ համարում, որ ԿԲ-ն հայտարարեց, որ տնտեսական գործերի ընթացքն ավելի լավ է, քան կանխատեսվում էր նախկինում: Մենք պետք է այս տեմպը ավելացնենք հնարավոր ամենալայն ծավալով»,-ասաց Փաշինյանը:
Իր հերթին ՊԵԿ նախագահ Էդվարդ Հովհաննիսյանը տեղեկացրեց, որ այս տարվա 4 ամիսների տվյալներով հարկային հավաքագրումները կազմում են 513 մլրդ դրամ, որը նախորդ տարվանից ավել է 12,3 մլրդ դրամով, իսկ 2019-ից ավել է 46,5 մլրդ դրամով:
«2021 թվականի 4 ամիսների տվյալներով կատարված գործարքների թիվը 2019-ի համեմատ ավել է 35,7 մլրդ հատով, իսկ դրամաշրջանառությունը վել է 372 մլրդ դրամով»,-ասաց նա:
