Սյունիքում մաքսային պահեստի փակումը չի հետեւել Սյունիքի իրադարձություններին, մաքսային պահեստներում ստուգումները վաղուց են իրականացվել եւ դրանք մշտական դիտարկման ներքո են եղել, ուղղակի դուք եք կապում նշված իրադարձությունների հետ: Այս մասին այսօր՝ մայիսի 6-ին, կառավարության նիստից հետո լրագրողների հետ զրույցում ասաց ՀՀ ՊԵԿ նախագահ Էդուարդ Հովհաննիսյանը՝ խոսելով Սյունիքի մարզում Ագարակում մաքսային պահեստների գործունեության դադարեցման մասին:
Նա նշեց, որ սովորաբար մաքսային պահեստի թույլտվությունը առհասարակ դադարեցվում է ՊԵԿ նախագահի հրամանով:
«Ստուգումներ իրականացվել են, մենք նշել ենք, որ ոչ միայն Ագարակի տերմինալի գործունեության թույլտվությունն է դադարել, այլ նաեւ դադարեցվել է այլ մաքսային պահեստի գործունեություն, որը չի համապատասխանել մաքսային կարգավորման մասին օրենքին»,-ասաց Էդուարդ Հովհաննիսյանը:
Հարցին, թե ինչով կարող է ապացուցել, որ սա քաղաքական ճնշում չէ Մեղրիի քաղաքապետի նկատմամբ, Հովհաննիսյանը պատասխանեց, որ հնչեցված հարցադրումներից արդեն պարզ է, որ հակառակ կարծիքը դժվար է համոզել. «Հանրությանն էլ համոզելու կարիք չեմ տեսնում: Ես պատասխանեցի ձեր հարցերին, մեկնաբանեցի մեր գործողությունները: Տվյալ պահեստի տարածքում բեռնաթափվել են ապրանքներ եւ մաքսազերծվել են: Այս պահին ապրանքները մաքսազերծվում են Մեղրիի մաքսակետում, այնտեղ կա նաեւ այլ մաքսային պահեստ: Ցանկության դեպքում տնտեսվարողները կարող են իրենց ապրանքները տեղափոխել այդ մաքսային պահեստ»:
Նկատված խախտումների մասով ՊԵԿ նախագահը նշեց, որ դրանց մասին մշտապես հանրությանը տեղեկացրել են:
Ավելի վաղ NEWS.am-ը հայտնել էր, որ ապրիլի 22-ին ՊԵԿ նախագահի հրամանով փակվել է մաքսատան Ագարակի տերմինալը, որի պատճառը ուղեբեռների ռենտգեն սարքավորման անջատված լինելն է եղել: ՊԵԿ նախագահի մաքսային գծով տեղակալ Շուշանիկ Ներսիսյանն հինգ րոպե մաքսային պահեստում գտնվելուց հետո խախտում է արձանագրել, որ տվյալ պահին նկարող ռեմտգեն սարքավորումն ուղղակի անջատված է եղել: Տերմինալի աշխատակիցները պնդում են, որ սա քաղաքական դրդապատճառներով է արվել, քանի որ այն հաջորդել է Ագարակում Նիկոլ Փաշինյանի այցին եւ դրա հետ կապված ցույցերին:
