Ռուսաստանը եւ Հայաստանը դիվանագիտական հարաբերությունների հաստատման 30-ամյակը եւ Բարեկամության եւ համագործակցության պայմանագրի 25-ամյակը նշելու են հանդիսավոր միջոցառումների մի ամբողջ ցիկլով, որոնք նպատակ ունեն ընդգծել հարաբերությունների դաշնակցային բնույթը: Այս մասին Երեւանում իր հայ գործընկեր Արա Այվազյանի հետ համատեղ մամուլի ասուլիսին հայտարարեց Ռուսաստանի արտգործնախարար Սերգեյ Լավրովը: Հոբելյանական օրերը նշվելու են հաջորդ տարի:
Նրա խոսքով՝ միջոցառումների ծրագիր է նախապատրաստվում: «Վստահեցնում եմ, որ այն գեղեցիկ կլինի եւ լավ կընդունվի մեր քաղաքացիների կողմից»,- հավելել է նախարարը:
Սերգեյ Լավրովը հայտնել է, որ բանակցությունների ընթացքում ՀՀ վարչապետի ժամանակավոր պաշտոնակատարը եւ արտգործնախարարը քննարկել են երկկողմ հետաքրքրություն ներկայացնող հարցերի լայն շրջանակ: Ռուս նախարարը շնորհավորել է գալիք Հաղթանակի օրվա առթիվ՝սուրբ ամսաթիվ, որը մեր ժողովուրդների, ԽՍՀՄ բոլոր ժողովուրդների ընդհանուր հարստությունն է:
«Մենք փայփայում ենք կարմիր բանակի հիշատակը, որը փրկեց աշխարհը շագանակագույն ժանտախտից»,- ասաց Լավրովը:
Նախարարը հակիրճ անդրադարձավ երկկողմ հարաբերությունների շրջանակին տնտեսական, ռազմական, ռազմատեխնիկական, կրթական, առողջապահական եւ անվտանգության ոլորտներում:
«Մենք համընկնող դիրքերիցդիտարկել ենք մի շարք տարածաշրջանային եւ միջազգային սյուժեներ: Պայմանավորվել ենք շարունակել սերտորեն համակարգել համագործակցությունը միջազգային կազմակերպություններում, աջակցել նախաձեռնություններին եւ թեկնածուներին»,- ասաց ԱԳՆ ղեկավարը:
Նրա խոսքով՝ ՌԴ-ի եւ ՀՀ-ի հարաբերությունները կայունության եւ խաղաղության կարեւոր գործոն են Հարավային Կովկասում: Լավրովը հայտնեց նաեւ, որ Արա Այվազյանին հրավիրել է հերթական այցով այցելել Ռուսաստան: