Թուրքիան 100 տարի անց վերադարձել է տարածաշրջան, որպեսզի շարունակի իր ցեղասպան քաղաքականությունը: Այս մասին մայիսի 10-ին Ազգային ժողովի հատուկ նիստում ՀՀ վարչապետի ընտրության հարցի քննարկման ժամանակ հայտարարեց վարչապետի պաշտոնակատար Նիկոլ Փաշինյանը՝ պատասխանելով ԱՄՆ-ի կողմից Օսմանյան կայսրությունում Հայոց ցեղասպանության ճանաչման մասին պատգամավորի հարցին։
Վարչապետի պաշտոնակատարը հիշեցրեց, որ ավելի վաղ, արդեն անդրադառնալով այս խնդրին, ինքը նշել է, որ Միացյալ Նահանգների այս քայլի վրա ազդել են 4 գործոններ՝ մեկը երկարաժամկետ, մեկը միջնաժամկետ եւ երկուսը կարճաժամկետ:
Միեւնույն ժամանակ, կարճաժամկետ գործոնների շարքում Փաշինյանը նշեց Ղարաբաղում 44-օրյա պատերազմը եւ դրանում Թուրքիայի անմիջական մասնակցությունը:
«Միջազգային լրատվամիջոցներին տված գրեթե բոլոր հարցազրույցներում ես նշել եմ, որ Թուրքիան 100 տարի անց վերադարձել է տարածաշրջան, որպեսզի շարունակի հայերի դեմ իր ցեղասպան քաղաքականությունը: Բնականաբար, այս համատեքստում, իհարկե, ցեղասպանության հարցը եւ 44-օրյա պատերազմը կապվել են միմյանց հետ»,- ասաց վարչապետի պաշտոնակատարը:
Նա հիշեցրեց նաեւ «անջատում հանուն փրկության» բանաձեւը, որի մասին եւս բազմիցս նշել է պատերազմի ժամանակ տված իր հարցազրույցներում:
Փաշինյանն ընդգծեց, որ ղարաբաղյան հիմնախնդրի համատեքստում այդ բանաձեւն ավելի ու ավելի հաճախ է հիշատակվում:
