ԵՄ 27 երկրների արտաքին գործերի նախարարները միության դիվանագիտության ղեկավար Ժոզեպ Բորելին հանձնարարել են այս տարվա նոյեմբերին ներկայացնել «ԵՄ ռազմավարական կողմնացույց» կոչվող առաջին եվրոպական ռազմական հայեցակարգի նախագիծը: Այս մասին ասվում է ԵՄ խորհրդի հայտարարության մեջ, որի նիստը կկայանա երկուշաբթի՝ Բրյուսելում, հաղորդում է ՏԱՍՍ-ը:
«Համաձայն 2019-2024 թվականների ռազմավարական օրակարգի, Խորհուրդը ԵՄ-ին կոչ է անում հետեւել գործողությունների առավել ռազմավարական ընթացքին եւ մեծացնել ինքնավար գործելու իր ներուժը: ԵՄ-ն պետք է խթանի իր շահերն ու արժեքները եւ կարողանա դիմակայել գլոբալ սպառնալիքներին ու անվտանգության մարտահրավերներին,- նշվում է դրանում,- Հետեւաբար, Խորհուրդը արտաքին գործերի եւ անվտանգության քաղաքականության գերագույն ներկայացուցչին կոչ է անում ներկայացնել «Ռազմավարական կողմնացույց»-ի առաջին նախագիծը՝ 2021 թվականի նոյեմբերին կայանալիք խորհրդի նիստում քննարկման համար»:
Բացի այդ, «Խորհուրդը առաքելությունների եւ գործողությունների հարցում ԵՄ կարողությունների ամրապնդման», ինչպես նաեւ «ժամանակին եւ արդյունավետ որոշումներ կայացնելու համար հարցը դիտարկելու» կոչ է անում: «Պետք է լրացուցիչ աշխատանք կատարվի այն բանի համար, որ անդամ երկրներին խրախուսի բարելավել ուժերի ձեւավորումը եւ առաքելությունների ու գործողությունների համար բավարար միջոցներ ու անձնակազմ տրամադրի»,- ասվում է փաստաթղթում:
Նախարարներն ընդգծում են, որ «անվտանգության եւ պաշտպանության առումով ուժեղ ԵՄ-ն շոշափելի օգուտ կբերի տրանսատլանտյան եւ գլոբալ համագործակցությանը»: «Խորհուրդը վերահաստատում է միջազգային գործընկերության առանցքային դերը բազմակողմ կազմակերպությունների հետ, ինչպիսիք են ՄԱԿ-ը եւ ՆԱՏՕ-ն»,- ասվում է հայտարարության մեջ:
Ներկայումս Եվրամիությունը սկսել է մշակել Եվրամիության առաջին ռազմական հայեցակարգը՝ «ԵՄ ռազմավարական կողմնացույցը»: Ներկայացնելով այս նախագծի հիմնական սկզբունքները՝ ԵՄ արտաքին գործերի եւ անվտանգության քաղաքականության գերագույն ներկայացուցիչ Ժոզեպ Բորելն ասել է, որ այս աշխատանքի նպատակներից մեկը պետք է լինի Եվրամիության համար որոշ ռազմավարական ինքնավարության ձեռքբերումը: Նա նաեւ հավաստիացրել է, որ ԵՄ-ն չի հավակնում առանց ԱՄՆ-ի վրա հույս դնելու ապահովել սեփական անվտանգությունը, այլ մտադիր է միայն պայմաններ ստեղծել՝ առանց ՆԱՏՕ-ի մասնակցության, անկախ օտարերկրյա ռազմական առաքելություններ իրականացնելու համար: