Արեւելյան Երուսաղեմում ոստիկանության հետ բախումների հետեւանքով վիրավորված պաղեստինցիների թիվն անցել է 305-ից, հաղորդում է ՏԱՍՍ-ը՝ հղում անելով Saut Al-Aqsa-ին:
«Ավելի քան 305 մարդ է վիրավորվել «Ալ-Ակսա» մզկիթում եւ Երուսաղեմի Հին քաղաքի արվարձաններում օկուպացիոն զորքերի հետ բախումների ժամանակ»,- Կարմիր մահիկի պաղեստինյան ընկերության ներկայացուցչի խոսքերն է մեջբերում լրատվամիջոցը: Նրա խոսքով՝ ներկայումս 228 մարդ գտնվում է հիվանդանոցներում, նրանցից յոթը ծայրահեղ ծանր վիճակում են եւ ուղարկվել են վիրահատության:
Ավելի վաղ Բեյրութից հեռարձակվող Al Mayadeen հեռուսաալիքը տեղեկացրել էր 278 վիրավոր պաղեստինցիների մասին: Նրա տվյալներով՝ արաբ բնակիչների եւ իսրայելական ոստիկանության միջեւ բախումները արդեն ամբողջովին դադարեցվել են: Իսրայելի ոստիկանությունն այժմ բացել է դեպի մզկիթ տանող ճանապարհները, ուր զգալի թվով հավատացյալներ են ուղեւորվել:
Պաղեստինյան WAFA լրատվական գործակալությունը հաղորդում է, որ Արեւելյան Երուսաղեմում բախումները վերսկսվել են երկուշաբթի, ժամը 08:00-ի սահմաններում, եւ շարունակվել են մինչ կեսօր: Նրա խոսքով, դրանց պատճառ է հանդիսացել աղոթքի համար հավաքված հավատացյալների հանդեպ ոստիկանների կոշտ վերաբերմունքը:
Արեւելյան Երուսաղեմում լարվածությունը սկսել է աճել ապրիլի կեսերից: Մայիսի 7-ին իսրայելական ոստիկանության եւ արաբների միջեւ բախումներ են տեղի ունեցել միանգամից երկու տեղում՝ Տաճարի լեռան մոտ եւ Շեյխ Ջարրախի շրջանում, որտեղից իսրայելական դատարանի որոշման համաձայն, անվտանգության ուժերը սկսել են վտարել արաբական մի քանի ընտանիքների: