Հնագետները հայտնաբերել են ինը նեանդերտալյան մարդկանց քարացած մնացորդներ Հռոմի մերձակայքում գտնվող քարանձավում:
Ամենահին մնացորդները թվագրվում են 90 000-100 000 տարվա վաղեմության ժամանակաշրջանին: Համարվում է, որ մյուս ութ նեանդերտալյան մարդկանց մնացորդները թվագրվում են 50 000-68 000 տարի հնության, ասված է Իտալիայի մշակույթի նախարարության հայտարարության մեջ:
Մշակույթի նախարար Դարիո Ֆրանչեսկինին անվանել է գտածոն «արտասովոր բացահայտում, որի մասին կխոսի ամբողջ աշխարհը, քանի որ այն հարստացնում է նեանդերտալյան մարդկանց հետազոտությունները:
Ինչպես գրում է Guardian-ը, նեանդերտալյան մարդկանց մեծամասնությունը, հավանաբար, սպանվել է բորենիների կողմից, այնուհետեւ նրանց տարել են քարանձավ, որը կենդանիների վերածել էին իրենց որջ, որտեղ եւ կերել են իրենց որսը:
«Նեանդերտալյան մարդիկ եղել են այդ կենդանիների որսը»,- Guardian-ին ասել է Տոր Վերգատի համալսարանի հնագիտության պրոֆեսոր Մարիո Ռոլֆոն: «Բորենիները որսացել են նրանց, հատկապես ամենախոցելի, հիվանդ եւ ծեր ներկայացուցիչներին»:
Բորենիների քարանձավում հայտնաբերվել են նաեւ խոշոր կաթնասունների, այդ թվում՝ բիզոնների, ռնգեղջյուրների, փղերի, հսկայական եղջերուների, քարանձավային արջերի եւ վայրի ձիերի մնացորդներ:
Անտրոպոլոգ Մարիո Ռուբինիի հայտարարության մեջ ասված է, որ այդ բացահայտումը «թույլ կտա լուսաբանել Իտալիայի բնակչության պատմությունը»: Նա ասել է, որ մնացորդների մեծամասնությունը մատնանշում է նեանդերտալյան մարդկանց զգալի թվի մասին, որոնք համարվում են առաջին մարդկային հասարակությունը, որի մասին կարելի է խոսել: