Xiaomi-ն արտոնագրել է ցիլինդրի ձեւ ունեցող սմարթֆոն, հայտնում է Lenta-ն՝ հղում անելով LetsGoDigital-ի հոլանդական հրատարակությանը:
Չինական ընկերության գյուտը ներկայացվել է Չինաստանի մտավոր սեփականության ազգային վարչություն (CNIPA) դեռ մարտ ամսին, սակայն հայտը չի հրապարակվել մինչեւ մայիս: Դատելով պատկերներից՝ Xiaomi-ի ներկայացրած սմարթֆոնը ցիլինդրաձեւ է, ճկուն էկրանը կարող է պտտվել պատյանի ներսում:
Լրագրողների կարծիքով՝ սարքի արտաքին տեսքը հիշեցնում է խելացի բարձրախոս Xiaomi Mi Smart Speaker, ինչի մասին վկայում են պատյանի ներքեւի հատվածում գտնվող բարձրախոսների անցքերը: Այնուամենայնիվ, արտոնագրի նկարագրության մեջ հստակ նշված է, որ գաջեթը «շարժական էկրանով» սմարթֆոն է:
Մասնագետները ուսումնասիրել են նախատիպի պատկերները եւ պարզել հեռախոսի առանձնահատկությունները, մասնավորապես՝ կրկնակի տեսախցիկը եւ USB-C միակցիչը լիցքավորման եւ տվյալների փոխանցման համար: «Դատելով ոսպնյակների կառուցվածքից՝ սրանք հիմնական, ֆլեշ եւ զում-տեսախցիկներն են», - հստակեցրել են լրագրողները:
Հաղորդվում է, որ շարժական էկրանը եւ տպավորիչ բարձրախոսների համակարգը այս մուլտիմեդիական սարքը հարմար են դարձնում ֆիլմեր դիտելու կամ երաժշտություն ունկնդրելու համար: Այնուամենայնիվ, առանձնահատուկ պատյանի պատճառով, թվում է, այնքան էլ հարմար չէ սարքով խոսելը եւ այն գրպանում կամ պայուսակում պահելը:
