Ընդհանրապես այս փուլում ընտրությունների մասին խոսելը ես համարում եմ անբարոյականություն: մենք երկիր ենք կորցնում: Այս մասին, այսօր՝ մայիսի 14-ին, ԱԺ-ում լրագրողների հետ զրույցում նշեց ԱԺ պատգամավոր Թագուհի Թովմասյանը:
«Մտնում են մեր տուն ադրբեջանցիները: Մենք երկիր ենք կորցնում ու գնում ենք ցուցակ կազմելու, քարոզարշավ անելու: Ո՞ւմ համար եք քարոզարշավ անում, եթե վաղը մենք երկիր չենք ունենալու, մեր սահմանները հանձնում ենք: մենք պետք է այս ռիսկերը հասկանանք ու ըստ այդմ գնահատենք: Իսկ Հայաստանում եւ իշխանությունը, եւ ընդդիմությունը զբաղված են հավասարապես իրենց անձնական, քաղաքական ապագան կառուցելով, բայց թե որ երկրում, դա ես չեմ կարողանում հասկանալ»,-ասաց նա:
Հարցին, թե արդյոք հիմա ռազմական դրության անհրաժեշտություն կա, պատգամավորը պատասխանեց. «Ես կարծում եմ՝ մենք վաղուց պետք է ռազմական դրություն հայտարարեինք, որովհետեւ այն ժամանակ, երբ որեւէ ոտնձգություն մեր սահմաններին չկար, մենք ռազմական դրություն էինք պահպանել: Հիմա երբ իրապես Հայաստանի սահմանային անվտանգությունը վտանգված է, մեր երկրի նկատմամբ իրականացվել ոտնձգություն ու մենք ռազմական դրություն չենք հայտարարում: Տրամաբանությունը չեմ հասկանում: Սրանից ավել էլ ի՞նչ պետք է լիներ, որ համարեինք, որ ռազմական դրության անհրաժեշտություն կա»:
