ԱՄՆ պետքարտուղար Էնթոնի Բլինքենը եւ Ֆրանսիայի արտգործնախարար Ժան-Իվ Լե Դրիանը կիրակի հեռախոսազրույցի ընթացքում քննարկել են պաղեստինա-իսրայելական հակամարտությունը, ինչպես նաեւ Լեռնային Ղարաբաղի շուրջ ստեղծված իրավիճակը: Այս մասին ասվում է Պետդեպարտամենտի մամուլի ծառայության ղեկավար Նեդ Փրայսի կողմից բանակցություններից հետո տարածված գրավոր հայտարարության մեջ:
Երկու երկրների արտաքին գործերի նախարարները «քննարկել են Իսրայելի, Հորդանան գետի արեւմտյան ափին եւ Գազայում շարունակվող բռնությունների հետ կապված իրենց համատեղ մտահոգությունները, ինչպես նաեւ՝ տարածաշրջանում գործընկերների հետ իրենց փոխգործակցությունը՝ խաղաղության հասնելու համար»,- նշել է Փրայսը: «Պետքարտուղար Բլինքենը եւ արտգործնախարար Լե Դրիանը խոսել են նաեւ ԵԱՀԿ Մինսկի խմբի համանախագահող երկրների համագործակցության մասին եւ շեշտել են Լեռնային Ղարաբաղում հակամարտության երկարաժամկետ քաղաքական կարգավորման անհրաժեշտությունը»,- ասել է դիվանագետը:
