Երկուշաբթի Շանհայի օֆիսային շենքերից մեկում հինգ մարդ վիրավորվել է դանակով զինված կնոջ կողմից հարձակման ենթարկվելու հետեւանքով։ Այս մասին ասվում է Weibo սոցիալական կայքի պաշտոնական աքաունթում Չանյին քաղաքային շրջանի հանրային անվտանգության վարչության հրապարակած հաղորդագրությունում, տեղեկացնում է ՏԱՍՍ-ը։
Միջադեպը տեղի է ունեցել առավոտյան, օֆիսային շենքերից մեկում, որը գտնվում է Ցզյանսու փողոցում։ Նախաքննության տվյալների համաձայն՝ հարձակումը կատարել է 37-ամյա մի կին, որը Շանհայ էր եկել մայիսի 15-ին՝ փնտրելու մեկին, որի հետ վեճ է ունեցել սիրային ապրումների հողի վրա։ Այն բանից հետո, երբ կնոջը հաջողվել է գտնել այդ մարդուն, նա դանակով հարձակվել է կողքին գտնվող մարդկանց վրա։ Արդյունքում՝ չորս մարդ թեթեւ վիրավորումներ է ստացել, եւս մեկ տուժող ուղարկվել է հիվանդանոց՝ բուժում ստանալու։
Գործի քննությունը շարունակվում է։