«Իսրայելի ահաբեկչությունը կարող է գլոբալ կամ տարածաշրջանային պատերազմ հրահրել»,- երեկ հայտարարել է Թուրքիայի «Ազգայնական շարժում» կուսակցության առաջնորդ Դեւլեթ Բախչելին` ՄԱԿ-ին կոչ անելով Երուսաղեմում խաղաղապահներ տեղակայել, հայտնում է MEM-ը:
«Իսրայելական ահաբեկչությունն անհնար է մարսել: Եթե այսպես շարունակվի, եթե դաժանությունը չդադարի, եթե շարունակվեն հավատքի եւ մարդու իրավունքների վրա կատեգորիկ հարձակումները, ապա վերջին ընտրությունը կլինի համաշխարհային կամ տարածաշրջանային պատերազմը»,- ասել է Բախչելին: Նա հավելել է, որ Իսրայելի վարչապետ Բենիամին Նեթանյահուն «մարդկության դեմ հանցագործություն» է կատարել եւ «պետք է կանգնի Հաագայի Միջազգային քրեական դատարանի առջեւ»:
«Թուրք ազգը, որը գիտի Երուսաղեմի ոգին եւ կառուցվածքը, պետք է ստանձնի նրա պաշտպանությունը»,- ասել է թուրք ազգայնականների առաջնորդը: «Կոչի դեպքում մենք պետք է գանք ու վերահսկողության տակ առնենք իրավիճակը»: