Իսրայելին եւս մի քանի օր է պետք Գազայում օպերացիան ավարտին հասցնելու համար, հայտարարել է Իսրայելի արտաքին գործերի նախարար Գաբի Աշկենազին ԱՄՆ պետքարտուղար Էնթոնի Բլինքենին: Սակայն վերջինս շեշտել է, որ ԱՄՆ-ն ակնկալում է, որ օպերացիան շուտով կավարտվի, հայտնում է Axios-ը՝ վկայակոչելով իսրայելցի պաշտոնյային:
Զրույցի ընթացքում Բլինքենն Աշկենազիին ասել է, որ ԱՄՆ-ն արգելափակում է ՄԱԿ-ի Անվտանգության խորհրդում Ֆրանսիայի նախաձեռնությունը Գազայի հարցով, բայց երկար ժամանակ չի կարող հրապարակավ եւ դիվանագիտորեն աջակցել Իսրայելին, հիմնականում՝ ՄԱԿ-ում, հայտարարում են իսրայելցի պաշտոնյաները:
Աշկենազին հայտարարել է, որ Իսրայելը դեռ մի քանի ռազմական նպատակ ունի, որոնք հույս ունի իրականացնել Գազայում, եւ որ իրեն ավելի շատ ժամանակ է պետք:
Վերջին օրերին Եգիպտոսի հետախուզության ներկայացուցիչները եւ Մերձավոր Արեւելքում ՄԱԿ-ի հատուկ բանագնաց Թոր Վենեսլանդը բանակցություններ են վարել «ՀԱՄԱՍ»-ի պաշտոնյաների եւ Իսրայելի ազգային անվտանգության խորհրդական Մեյր Բեն Շաբաթի հետ հնարավոր հրադադարի վերաբերյալ:
Իսրայելցի պաշտոնյաները հայտարարում են, որ Բեն Շաբաթը լսել է առաջարկները, բայց Նեթանյահուից բանակցություններ սկսելու թույլտվություն չի ստացել: Մյուս կողմից, «ՀԱՄԱՍ»-ն ակտիվորեն գործում էր:
Իսրայելցի պաշտոնյաները հայտնել են, որ հինգշաբթի քաղաքականության փոփոխություն եւ բանակցությունների մեկնարկ են ակնկալում:
Մինչդեռ «ՀԱՄԱՍ»-ի պաշտոնական ներկայացուցիչ Մուսա Աբու Մարզուկը չորեքշաբթի հայտարարել էր, որ ակնկալում է, որ բանակցությունները մեկ-երկու օրվա ընթացքում զինադադարի կհանգեցնեն:
Այնուամենայնիվ, ըստ իսրայելական իշխանությունների, համաձայնության հասնելը կարող է 24-ից 72 ժամ տեւել՝ ժամանակ, որն Իսրայելն ուզում է օգտագործել Գազայում իր ռազմական պլաններն ավարտին հասցնելու համար:
