Իսրայելը ավիահարվածների շարք է հասցրել Գազայի հատվածին, ինչի հետեւանքով առնվազն մեկ պաղեստինցի զոհվել է, մի քանիսը վիրավորվել են։
Պայթյունները ցնցել են Գազա քաղաքը, եւ նարնջագույն բոցը լուսավորել է լուսադեմի երկինքը։ Տեղեկացվել է նաեւ Դեյր էլ Բալահ կենտրոնական քաղաքում եւ Խան-Յունիս հարավային քաղաքում տեղի ունեցած ավիահարվածների մասին։ Լուսադեմին Խան-Յունիսի բնակիչներն ականատես են եղել առնվազն հինգ մասնավոր տան փլատակներին։ Ուժեղ ավիահարվածներ են հասցվել նաեւ Գազա քաղաքի Աս Սաֆթավի առեւտրային փողոցին, տեղեկացնում է AP-ը։
Իսրայելցի զինվորականները հայտարարել են, որ հարվածներ են հասցրել ՀԱՄԱՍ-ի հրամանատարների չորս տների՝ թիրախավորելով «ռազմական ենթակառուցվածքը», ինչպես նաեւ Գազա քաղաքում ՀԱՄԱՍ-ի գրոհայինի տան զինապահեստը։
Իսրայելական ավիահարվածի հետեւանքով Խան-Յունիսում Խավալդի ընտանիքի երկհարկանի տունը փլուզվել է։ Հարեւանի խոսքով՝ բոլոր 11 բնակիչները վիրավորվել են եւ հոսպիտալացվել։
Նրա խոսքով՝ կոտորակառումբն ընկել է հարեւանությամբ գտնվող ընտանիքի տան վրա՝ սպանելով մորաքրոջը, վիրավորելով աղջկան եւ երկու քեռորդիներին։ Մերձակա հիվանդանոցի ներկայացուցիչը հաստատել է կնոջ զոհվելու փաստը եւ ասել, որ առնվազն 10 մարդ վիրավորումներ է ստացել։
Իսրայելի վարչապետ Բենիամին Նեթանյահուն մերժել է Բայդենի աշխատակազմի կոչը՝ դադարեցնել գործողությունը, որի հետեւանքով հարյուրավոր մարդիկ են զոհվել։ Սա առաջին հրապարակային անհամաձայնությունն է երկու մերձավոր դաշնակիցների միջեւ անցած շաբաթ մարտական գործողությունների սկսման պահից եւ կարող է դժվարացնել հրադադարի հասնելու միջազգային ջանքերը։
