Մարդու իրավունքների եվրոպական դատարանը Ադրբեջանի իշխանություններին մեղավոր է ճանաչել ռուս եւ իսրայելցի հայտնի բլոգեր Ալեքսանդր Լապշինի դեմ մահափորձի մեջ:
«Հաղթանա՛կ։ Մարդու իրավունքների եվրոպական դատարանը Ադրբեջանի իշխանություններին մեղավոր է ճանաչել Բաքվի բանտում իմ դեմ սպանության փորձի եւ դաժան խոշտանգումներ կիրառելու մեջ: Ադրբեջանին պարտավորեցրել են ինձ 30 000 եվրո փոխհատուցում վճարել»,- գրել է Լապշինը Facebook-ի իր էջում:
Հիշեցնենք, որ 2016-ի վերջին Լապշինը Մինսկում ձերբակալվել էր Ադրբեջանի խնդրանքով, որը նրան ընդգրկել էր «սեւ ցուցակում»՝ առանց Բաքվի հետ համաձայնեցնելու Լեռնային Ղարաբաղի Հանրապետություն այցելելու համար: Բելառուսի գլխավոր դատախազությունը որոշում էր կայացրել բավարարել Ադրբեջանի խնդրանքը եւ հանձնել Լապշինին: Բաքվի դատարանը Լապշինին դատապարտել էր երեք տարվա ազատազրկման: 2017թ․ սեպտեմբերի 11-ին Ադրբեջանի նախագահ Իլհամ Ալիեւը անսպասելիորեն Իսրայելի քաղաքացի Ալեքսանդր Լապշինին ներելու մասին հրաման էր ստորագրել: Ինչպես պարզվեց, նույն օրը բանտում Լապշինի դեմ մահափորձ է կատարվել, ընդ որում՝ Ադրբեջանի իշխանությունները փորձել են դա որպես ինքնասպանության փորձ ներկայացնել:
