Գերմանիայի կանցլեր Անգելա Մերկելը հայտարարել է Իսրայելի ինքնապաշտպանության իրավունքի մասին` նշելով, որ Գերմանիան աշխատում է իսրայելա-պաղեստինյան հակամարտության սրման հետ կապված կայուն հրադադարի ռեժիմի ապահովման ուղղությամբ, հայտնում է Reuters-ը:
«Մենք հանդես ենք գալիս Իսրայելի ինքնապաշտպանության իրավունքի օգտին, ուստի կարծում ենք՝ ճիշտ է, որ Իսրայելը զանգվածային գործողություններ է ձեռնարկում»,- WDR հանրային հեռուստաընկերությանը տված հարցազրույցում հայտարարել է Մերկելը: «Բայց մյուս կողմից՝ մենք ցանկանում ենք մեր ներդրումն ունենալ տարածաշրջանում երկարաժամկետ եւ կայուն իրավիճակ ապահովելու դիվանագիտական ջանքերում»:
Նրա խոսքով՝ Գերմանիան վարում է հակասեմականության դեմ «զրոյական հանդուրժողականության» քաղաքականություն՝ սինագոգերի վրա կատարված մի քանի հարձակումներից հետո, որոնք զուգադիպեցին Իսրայելի եւ ՀԱՄԱՍ-ի միջեւ ռազմական գործողություններին: Նա հավելել է, որ ցանկացած հրադադար պետք է ներառի ՀԱՄԱՍ-ի հետ անուղղակի բանակցություններ։