Հայ դատի Ամերիկայի հանձնախմբի նախագահ Րաֆֆի Համբարյանը ամերիկյան օրենսդիրներին հորդորել է օրենքի ուժով ապահովել «907-րդ բանաձեւի» կատարումը եւ դադարեցնել որեւէ տեսակի ռազմական օժանդակությունն Ադրբեջանին: Այս մասին NEWS.am-ը տեղեկանում է ՀՅԴ Բյուրոյի Հայ Դատի կենտրոնական գրասենյակից:
Հաղորդագրության մեջ ասվում է.
«Հայ դատի Ամերիկայի հանձնախմբի ջանքերով, փետրվարին ԱՄՆ Ներկայացուցիչների պալատի ավելի քան 100 անդամներ միացել էին Կոնգրեսի հայկական խմբին` Բայդենի վարչակազմին ներկայացնելով Հայաստանին, Արցախին եւ Հայոց ցեղասպանությանը վերաբերող քաղաքական առաջնահերթությունների շրջանակ:
Այն իր մեջ ներառում էր՝
• հայ ռազմագերիների հարցը,
• Թուրքիային եւ Ադրբեջանին իբրեւ ագրեսոր պետությունների ճանաչում,
• Հայաստանին եւ Արցախին խոշոր ֆինանսական օժանդակության տրամադրում,
• «907-րդ բանաձեւի» պահանջների կատարում,
• Թուրքական անօդաչուներում ամերիկյան տեխնոլոգիաների կիրառման բացառում,
• Թուրքիայի կողմից վարձկան ահաբեկիչների տեղափոխման եւ ռազմական գործողություններում նրանց օգտագործմանն անդրադարձ։
Պետդեպարտամենտը 2021 թվականի մայիսի 6-ին խիստ թերի պատասխան գրություն է ուղարկել կոնգրեսականներին, ինչին մայիսի 19-ին արձագանքել է Հայ դատի Ամերիկայի հանձնախմբի նախագահ Րաֆֆի Համբարյանը։
ԱՄՆ Ներկայացուցիչների պալատի ավելի քան հարյուր ներկայացուցիչներին ուղարկած նամակով՝ Ամերիկայի Հայ դատի հանձնախմբի նախագահ Րաֆֆի Համբարյանը ներկայացնում է ԱՄՆ հայ համայնքի խորը հիասթափությունը Պետքարտուղարության կողմից Կոնգրեսի անդամներին ուղղված պատասխանի կապակցությամբ:
Հայ դատի հանձնախմբի նախագահն իր նամակում ընդգծում է. «Միացյալ Նահանգները պետք է արգելանք դնի Բաքվի ռազմատենչությանը, այլ ոչ թե խրախուսի ադրբեջանական ագրեսիան: Ամերիկյան ռազմական օգնություն տրամադրումը նավթով հարուստ Ալիեւի վարչակարգին, որն ուղղակիորեն սպառնում է հայերին իրենց բնիկ հայրենիքում, հակասում է Նախագահ Բայդենի նախընտրական հայտարարություններին եւ նրա կողմից վերջերս Հայոց ցեղասպանության ճանաչմանը: Ցեղասպանության ճանաչումը լուրջ պատասխանատվություն է ենթադրում՝ չզինել այն երկրներին, որոնք բացահայտ ձգտում են ավարտին հասցնել հենց այդ հանցագործությունը»։
Շնորհակալություն հայտնելով շուրջ 100 կոնգրեսականներին՝ Համբարյանը վերջիններիս կոչ է անում ստիպել Պետքարտուղարությանը՝ բովանդակային անդրադարձ կատարել դեռեւս փետրվարին բարձրացված հարցերին, ինչպես նաեւ Սպիտակ տնից հետ կանչել «907-րդ բանաձեւի» կատարումից հրաժարվելու հնարավորությունը եւ օրենքի ուժով արգելել Արդբեջանին ԱՄՆ կողմից ռազմական կամ անվտանգային նշանակության օգնության տրամադրումը։
Նամակի ամբողջական տեքստին կարող եք ծանոթանալ ԱՅՍՏԵՂ: