Մենք առավելագույն վնաս ենք հասցրել ՀԱՄԱՍ-ին` նվազագույն վնաս հասցնելով չներգրավված խաղաղ բնակչությանը, ինչպես պատմության մեջ ոչ մի երկիր կամ բանակ։ ՑԱԽԱԼ-ը աշխարհի ամենաբարոյական բանակն է: Այս մասին հայտարարել է Իսրայելի վարչապետ Բենիամին Նեթանյահուն՝ խոսելով Իսրայելի ու ՀԱՄԱՍ-ի միջեւ հրադադարի ռեժիմն ուժի մեջ մտնելուց տասնմեկ ժամ անց, հայտնում է Իսրայելի «9-րդ ալիքը»:
Նա շնորհակալություն է հայտնել Իսրայելի անվտանգության ուժերի հրամանատարությանը եւ շարքային քաղաքացիներին՝ համառության եւ դիմացկունության համար: «Մենք փոխեցինք հավասարումը,- ասել է Նեթանյահուն,- ոչ միայն գործողության ընթացքում, այլ նաեւ ապագայի համար: Եթե ՀԱՄԱՍ-ը կարծում է, որ մենք վախենում ենք ահաբեկիչների հրթիռներից, դա այդպես չէ։ Մենք միշտ անհրաժեշտ ինտենսիվությամբ կարձագանքենք Գազայի հատվածին սահմանակից իսրայելական բնակավայրերի եւ Իսրայելի ցանկացած այլ վայրի դեմ ագրեսիայի ցանկացած դրսեւորմանը »:
