Գերմանիայում դատարանը ցմահ ազատազրկման է դատապարտել սիրիացուն՝ անցյալ տարի Դրեզդենում զբոսաշրջիկ սպանելու եւ մեկ այլ անձի ծանր վիրավորելու համար, հայտնում է AP-ն:
Սաքսոնիայի տարածաշրջանային բարձրագույն դատարանի ներկայացուցիչը տեղեկացրել է, որ Աբդուլլահ Ա.Խ-ն մեղավոր է ճանաչվել սպանության, մահափորձի եւ ծանր մարմնական վնասվածքներ հասցնելու մեջ:
Դատախազությունը հայտնել է, որ 21-ամյա տղամարդը մտադրվել էր հարձակման ժամանակ երկու տղամարդկանց էլ սպանել, քանի որ նրանց համարում էր «անհավատներ»:
Երիտասարդը Գերմանիա էր եկել 2015 թվականին՝ պատերազմից փախած հազարավոր իր հայրենակիցների հետ միասին: Իշխանությունները զրկել էին նրան փախստականի կարգավիճակից այն բանից հետո, երբ նա 2018 թվականին մեկ այլ գործով ավելի քան երկու տարվա ազատազրկման էր դատապարտվել ահաբեկչական գործունեության համար:
