Ալիեւն այսօր պաշտոնապես հրավիրեց բրիտանացի գործարարներին ներդրումներ անել Արցախի զավթված տարածքներում եւ մասնավորապես Քարվաճառում, որտեղ կան բնական լուրջ պաշարներ։ Այս մասին ֆեյսբուքի իր էջում գրել է «Բարգավաճ Հայաստան» խմբակցության պատգամավոր Նաիրա Զոհրաբյանը։
Նա, մասնավորապես, գրել է․
«Երբ դեռ կապիտուլյացիոն խայտառակության ստորագրումից օրեր առաջ գրեցի, որ Ադրբեջանն արդեն Շուշին հռչակել է իր մշակութային մայրաքաղաքը եւ 2021-ի օգոստոսին Շուշիում ադրբեջանական խոհանոցի միջազգային փառատոն է նախաձեռնել, քայլական կոնգլոմերատը կրկին ընկավ ցնցակաթվածի մեջ ու րոպեում 100 կիլոմետր արագությամբ հերքումներ տարածեց լկտի ստի եւ հեղափոխության սուրբ արժեքները ոտնահարելու մասին։
Օգոստոսին Շուշիում փառատոնը, այդուհանդերձ, կայանալու է, իսկ այսօր Ալիեւը պաշտոնապես հրավիրեց բրիտանացի գործարարներին ներդրումներ անել Արցախի զավթված տարածքներում եւ մասնավորապես Քարվաճառում, որտեղ կան բնական լուրջ պաշարներ։
Մեծ Բրիտանիայի Anglo Asian mining ընկերությունը, որը դեռեւս պատերազմից ամիսներ առաջ Ադրբեջանի հետ Զանգելանի ոսկու հանքի շահագործման պայմանագիր էր կնքել, արդեն հայտարարել է ներդրումների մասին, իսկ բրիտանական մի շարք այլ ընկերություններ թուրքին հանձնված մեր տարածքներում պատրաստվում են տնտեսական լուրջ ներդրումներ անել։
Մնացածը՝ no comment»։