Ջավախքի հարցում Վրաստանի իշխանություններն անցնող տարիներին ցուցաբերել են առավել նուրբ ու բարդ մոտեցում: Այդ մասին այսօր` հունիսի 24-ին ՀՅԴ Ընդհանուր ժողովում հայտարարել է կուսակցության Բյուրոյի ներկայացուցիչ Հրանտ Մարգարյանը:
Նրա խոսքով, մի կողմից երկրամասը օժտել եւ շարունակում են օժտել հաղորդակցության եւ էներգետիկ ժամանակակից ենթակառույցներով, ինչը տնտեսական զարգացման նախադրյալներ է ստեղծում, մյուս կողմից` հստակ նպատակադրումով երկրամասը մնում է Վրաստանի տնտեսապես ամենահետամնաց շրջանը:
«Ավելին` Վրաստանի իշխանությունները շարունակում են աննախադեպ ճնշում գործադրել հասարակության ակտիվ շրջանակների վրա եւ վախի մթնոլորտ են ստեղծել ժողովրդի մոտ: Բացահայտորեն խոչընդոտվում է Ջավախքի ժողովրդի հայկական ինքնության պայհպանումը, շարունակվում է քաղաքական խտրականությունը հայ ազգաբնակչության նկատմամբ, ժողովրդագրական վիճակը ի վնաս հայության փոխելու քաղաքականությունը», - հայտարարել է Մարգարյանը, հավելելով, որ ՀՅԴ-ն շարունակում է աջակցել ջավախահայության ինքնավարության պահանջին:
«Բոլոր նրանք, ում համար կարեւոր են Հայաստան-Վրաստան փոխհարաբերությունները, պետք է գիտակցեն` Ջավախքը վառոդով լեցուն տակառ է, որն ուշ թե շուտ պայթելու է, եթե ժամանակին չցուցաբերվի խոհեմություն եւ Ջավախքին չտրվի այն, ինչ սահմանում է միջազգային օրենքն ու փորձը», - ասել է Մարգարյանը: