Բոլոր պետական եւ մասնավոր առողջապահական հաստատությունները պետք է հետեւեն մուկորմիկոզի` նախարարության կողմից տրված սքրինինգի, ախտորոշման եւ բուժման ցուցումներին:
Ջամու եւ Քաշմիր հնդկական միութենական երկրամասի կառավարությունը երկուշաբթի մուկորմիկոզը համաճարակ է հայտարարել («սեւ բորբոս»):
Ըստ Times of India թերթի, սույն որոշման համաձայն, վտանգավոր սնկային հիվանդության` մուկորմիկոզի բուժումը պետք է իրականացվի 1897-ի Համաճարակային հիվանդությունների մասին հնդկական օրենքի համաձայն, որը հատուկ միջոցներ է նախատեսում համաճարակների տարածման դեմ պայքարի համար, փոխանցում է ՏԱՍՍ-ը:
«Բոլոր պետական եւ մասնավոր առողջապահական հաստատությունները պետք է հետեւեն առողջության եւ ընտանիքի բարեկեցության նախարարության, Հնդկաստանի կառավարության եւ Հնդկաստանի բժշկական հետազոտությունների խորհրդի կողմից տրված մուկորմիկոզի սքրինինգի, ախտորոշման եւ բուժման ցուցումներին»,- ասել են Ջամուի եւ Քաշմիրի առողջապահական վարչությունում:
«Սեւ բորբոսի» տարածման պատճառով Հնդկաստանի կառավարությունն անցյալ շաբաթ երկրի բոլոր շրջաններին կոչ էր արել հիվանդությունը համաճարակ հայտարարել: Մինչ օրս, բացի Ջամուից եւ Քաշմիրից, կենտրոնական իշխանությունների այս առաջարկությանը հետեւել են Ռաջաստան եւ Թելանգանա նահանգները:
Հնդկաստանի արեւմուտքում` Գուջարաթ եւ Մահարաշթրա նահանգներում, մինչ օրս գրանցվել է մուկորմիկոզով վարակման ավելի քան 4 հազար դեպք: Ըստ պաշտոնական տվյալների` Հնդկաստանում այս վարակով վարակված մարդկանց ընդհանուր թիվը 8848 մարդ է: Դրանից հատկապես տուժել են Գուջարաթ, Մահարաշթրա, Անդրա Պրադեշ, Ռաջաստան եւ Կարնատակա նահանգները:
Մասնագետների կարծիքով` մուկորմիկոզն ախտորոշվում է կորոնավիրուսով տառապող այն հիվանդների մոտ, ովքեր գտնվել են վերակենդանացման բաժանմունքում եւ երկար ժամանակ ստերոիդներ կամ թթվածին են ստացել: Այս հիվանդությունը հանդիպում է նաեւ դիաբետիկների մոտ, ովքեր երկար ժամանակ ստերոիդների մեծ չափաբաժիններ են ստանում:
