Գազայի հատվածում ՀԱՄԱՍ շարժման առաջնորդներից եւ հիմնադիրներից մեկը՝ Մահմուդ Ալ-Զախարը, ասել է, որ Իսրայելի ուղղությամբ հրթիռների արձակումները պաղեստինյան անկլավի խիտ բնակեցված տարածքներից չեն եղել, հայտնում է «ՌԻԱ Նովոստին»:
«Քաղաքացիական տարածքից ոչ մի հրթիռ չի արձակվել»,- ասել է նա Sky News-ին՝ հավելելով, որ հրթիռների մեծ մասը արձակվել է Իսրայելի հետ սահմանի մոտ:
Խոսելով չորրորդ օրն Իսրայելի հետ գործող հրադադարի ռեժիմի մասին՝ Ալ-Զախարը համոզմունք է հայտնել, որ այս ռեժիմը չի խախտվի: «Կարծում եմ, որ երկու կողմերից ոչ ոք ավելի շատ չի ձգտում էսկալացիայի, քան նախկինում էր: Ուստի ես հավատում եմ, որ այն կշարունակվի»,- ասել է ՀԱՄԱՍ-ի ներկայացուցիչը:
Բացի այդ, նա ուշադրություն է հրավիրեց այն բանի վրա, որ ՀԱՄԱՍ-ը դեմ չէ ԱՄՆ նախագահ Ջո Բայդենի հետ հանդիպում անցկացնելուն: «Իսկ ինչո՞ւ ոչ»։ Այո, Բայդենը սատարում է Իսրայելին, բայց ես կարծում եմ, որ մենք, որպես պաղեստինյան ժողովուրդ, նրա հետ անկեղծորեն խոսելու առաքելություն ունենք»,- ասել է նա:
ԱՄՆ-ը եւ մի շարք այլ երկրներ, այդ թվում՝ Իսրայելը, ՀԱՄԱՍ-ին համարում են ահաբեկչական կազմակերպություն:
Իսրայելի անվտանգության նախարարների կաբինետը մայիսի 20-ի երեկոյան միաձայն ընդունել էր հակամարտության իսրայելա-պաղեստինյան գոտում առանց որեւէ պայմանի երկկողմ հրադադարի մասին Եգիպտոսի նախաձեռնությունը: Հրադադարը ուժի մեջ է մտել մայիսի 21-ի առավոտյան 2-ին: