ԱՄՆ պետքարտուղար Էնթոնի Բլինքենը երեքշաբթի առավոտյան առաջին անգամ պաշտոնը ստանձնելուց հետո ժամանել է Իսրայել, որտեղ նախատեսում է բանակցություններ վարել հրեական պետության վարչապետ Բենիամին Նեթանյահուի եւ արտաքին գործերի նախարար Գաբի Աշկենազիի հետ, փոխանցում է ՏԱՍՍ-ը` վկայակոչելով Kan-ը:
Բեն-Գուրիոն օդանավակայանում Բլինքենին դիմավորել է նրա իսրայելցի գործընկերը: Նեթանյահուի գրասենյակը հայտնել է, որ պետքարտուղարի եւ Իսրայելի կաբինետի ղեկավարի բանակցությունների մեկնարկը տեղի կունենա Երուսաղեմում գտնվող Նեթանյահուի գրասենյակում: Դրանից հետո նախատեսվում է Բլինքենի կհանդիպումն Աշկենազիի հետ, որը, ռադիոկայանի տվյալներով, տեղի կունենա Իսրայելի ԱԳՆ շենքում:
Բլինքենի` Իսրայելից սկսվող այցի շրջանակներում պանակցություններ են նախատեսված Պաղեստինի նախագահ Մահմուդ Աբասի, Եգիպտոսի նախագահ Աբդել Ֆաթթահ էլ-Սիսիի, Հորդանանի թագավոր Աբդուլահ Երկրորդի հետ` Գազայի հատվածում հրադադարի ռեժիմի հաստատման համար:
Մայիսի 21-ի գիշերն ափամերձ անկլավում ուժի մեջ մտավ հրադադարի ռեժիմը Իսրայելի եւ պաղեստինյան խմբավորումների միջեւ, որոնք 11 օր շարունակ փոխանակվում էին հարվածներով: Դրանք հետեւել էին Արեւելյան Երուսաղեմի Ալ-Աքսա մզկիթում տեղի ունեցած անկարգություններին, որոնք սկսվել էին այնտեղ ապրող արաբական ընտանիքներից Շեյխ Ջարրահ թղամասում գտնվող տները բռնագրավելու մասին Իսրայելի դատարանի որոշումից հետո: