Իրանական միջուկային ծրագրի վերաբերյալ Գործողությունների համատեղ համապարփակ պլանի (ԳՀՀՊ) շրջանակներում Վաշինգտոնի եւ Թեհրանի գործողությունները պետք է մանրամասն սինխրոնիզացվեն եւ համապատասխանեն գործարքի տառին: Այս մասին ասվում է ՌԴ ԱԳՆ պաշտոնական ներկայացուցիչ Մարիա Զախարովայի երեքշաբթի օրը տարածված մեկնաբանության մեջ:
ԳՀՀՊ համատեղ հանձնաժողովի հովանու ներքո անցկացվող բազմակողմ խորհրդակցությունների հերթական փուլի մեկնարկը նախատեսված է երեքշաբթի օրը, նշել է դիվանագետը: «Հուսով ենք, որ միջուկային գործարքին մասնակցող բոլոր երկրների, այդ թվում՝ Իրանի, ինչպես նաեւ ԱՄՆ-ի ներկայացուցիչների համախմբված ջանքերի շնորհիվ հնարավոր կլինի առաջ շարժվել ընդառաջ քայլերի համաձայնեցման ուղով, որոնք Վաշինգտոնը պետք է նախաձեռնի՝ ԳՀՀՊ-ի խիստ պահանջները պահպանելու առումով, ինչը, իր հերթին, անհրաժեշտ պայմաններ կստեղծի Թեհրանի կողմից ինքնակամ պարտավորությունների հալեցման համար, որոնք կասեցվել էին ի պատասխան 2015-ի համապարփակ համաձայնագրերի եւ ՄԱԿ ԱԽ 2231 բանաձեւի ամերիկյան կոպիտ խախտումների, ընդգծել է նա: «Կարծում ենք, որ ԱՄՆ-ի եւ Իրանի գործողությունները պետք է մանրամասն սինխրոնիզացվեն եւ լիովին համապատասխանեն ԳՀՀՊ-ի տառին»:
Զախարովայի խոսքով՝ միայն այդպես կարելի է վերադարձնել միջուկային գործարքի իրականացումը սկզբնապես համաձայնեցված շրջանակներ եւ այս գործընթացին վստահ հեռանկար տալ: «Կոչ ենք անում ԳՀՀՊ-ի բոլոր գործընկերներին, ինչպես նաեւ ԱՄՆ-ին բոլոր ջանքերը գործադրել այն բանի համար, որպեսզի հնարավորինս սեղմ ժամկետում հաղթահարվեն դրված խնդիրները»,- հավելել է ՌԴ ԱԳՆ պաշտոնական ներկայացուցիչը:
Դիվանագետը նաեւ նշել է, որ Մոսկվան ողջունում է Իրանի եւ ԱԷՄԳ-ի միջեւ ժամանակավոր «տեխնիկական ըմբռնումների» երկարաձգումը: «Ելնում ենք նրանից, որ դրանք [պայմանավորվածությունները] անհրաժեշտ քաղաքական տարածք են ստեղծում ինտենսիվ բանակցությունների շարունակման համար, որոնք ուղղված են իրանական միջուկային ծրագրի շուրջ կարգավորման Գործողությունների համատեղ համապարփակ պլանի կայուն եւ լիարժեք իրականացմանը»,- ասել է Զախարովան: «Ստուգման ոլորտում Իրանի եւ ՄԱԳԱՏԷ-ի սերտ համագործակցությունը կարեւորագույն կայունացնող գործոն է, իրանական միջուկային ծրագրի կանխատեսելիության եւ թափանցիկության երաշխիք եւ դրա հետ կապված տարածման ռիսկերի բացակայության երաշխիք»:
Ապրիլի սկզբից Վիեննայում դեմ առ դեմ անցկացվող բանակցությունների մասնակիցները նշում են իրենց աշխատանքում կայուն առաջընթացը: Երեք աշխատանքային խմբերի փորձագետները մշակում են ապագա համաձայնագրի տեքստը, որի նպատակը ԳՀՀՊ-ի իրականացման վերսկսումն է՝ Թեհրանի նկատմամբ Վաշինգտոնի պատժամիջոցների վերացումը (ու գործարքին ԱՄՆ-ի ապագա վերադարձը) եւ Իրանի միջուկային պարտավորությունների կատարումը: